Sri Lanka president hlui, Gotabaya Rajapaksa chu a tawm bo mekna, Singapore atangin a kir leh dawn tih an ram MP-in a sawi.
Cabinet thupuangtu, Bandula Gunawardena chuan Thawhlehni khan Rajapaksa hi a biru a nih loh thu leh a kir leh dawn thu a sawi a, a hun tur erawh a sawi lo.
An ram hruaitu hlui hian Sri Lanka mipuiten eibar dinhmuna chhiatna lian tak an tawh avanga a sorkar duh lohna nasa tak an lantir hnuah an ram a chhuahsan.
Mi tam tak chuan an ram sum leh a enkawl dan a dik loh avangin ni tin mamawh nasa taka sangin harsatna lian tak an tawn phah niin a sawi.
Rajapaksa hian July 13 khan an ram chhuahsanin Maldives a pan a, a tukah Singapore a pan zui leh.
Singapore a thlen hnu lawkah a bânna a thehlut a, Sri Lankan cabinet chuan tih dan phung pangngai angin July 15 khan an pawmsak.
President hlui hi a nupui leh vengtu pahnih nena chhuak an ni a. An ram a chhuahsan avang hian ram hruaitu lu ber a ni thei tawh lo.
Singapore chuan president paih thlak tak hian an ram a thlen hnuah inhumhimna a dil lem lo tih an sawi.
Rajapaksa hi ni 14 a cham theihna visa an pe a; mahse, ni 14 dang atan pawhseisak leh a ni tih Singapore chanchinbute chuan Nilaini khan an chhuah.
A awm zel dan tur hi inrinsiak a ni hman nual a, United Arab Emirates a pan dawn nia sawi pawh an awm.
Hetih lai hian Bloomberg chuan Sri Lankan thuneitu sang pakhat, a hming tar lan lohvin Colombo-ah a kir leh dawn tih a sawi tih an tar lang bawk.
Thawhlehni khan Gunawardena chuan, “Ka hriat dan chuan a lo haw leh a rinawm,” tiin thuthar lakhawmtute hnenah a sawi bawk.
A bân hnuah Rajapaksa hi ama thawhpui reng leh a lamtang thin, Ranil Wickremesinghe chuan a thlak a, kar hmasa khan MP-ten president atan an thlang a; mahse, mipuiah chuan ani pawh hi a tla na lo hle a ni.