Gujarat home department chuan tun hnaia an state-a zu chhe in avanga mi 42 zet an thih hnuah Botad leh Ahmedabad Superintendents of Police-te chu a sawn a, police paruk an hna atanga chawlh lailawktir an ni bawk tih thuneitute chuan an sawi.
Police-in an chhuia an hmuh tawh chinah chuan Botad sistrict-a khaw eng emaw emaw zatah zu siam tenau teteten an zu siamah tui leh industry-a hman chi, mihring tana hlauhawm tak, methyl alcohol (Methanol) an pawlh a, fun khat zel Rs. 20-in an hralh tih an sawi.
Police hian forensic thiamten an endiknaah thite hian methyl alcohol an in ngei tih an hmu tih an sawi.
“Botad SP Karanraj Vaghela leh Ahmedabad SP Virendrasingh Yadav te chu sawn an ni a. Deputy SP pahnih telin police thuneitu dang paruk chu suspend an ni,” tiin Additional Chief Secretary, Home, Raj Kumar chuan PTI a hrilh.
Suspend-te hi Ahmedabad-a Dholka division Dy. SP N V Patel, Botad Dy. SP S K Trivedi, Ahmedabad-a Dhandhuka police station inspector K P Jadeja, Dhandhuka division circle police inspector S B Chaudhari leh Botad sub-inspector pahnih, B G Vala leh Shailendrasinh Rana te an ni.
Home department-in suspend an ni tih hriattirna a chhuahah chuan heng officer-te hian ‘an duty an hlamchhiah a, an huam chhungah bawlhlo him lo tel phurh kual, hralh leh in an dan theih loh avangin hrem’ an ni tih tar lan a ni.
Botad leh a thenawm, Ahmedabad district-ah zu chhe in avang hian July 25 atang khan mi 42 zet an thi tawh a, mi dang 97 chu Bhavnagar, Botad leh Ahmedabad-ah enkawl mek an la ni tih Gujarat Minister of State for Home Harsh Sanghavi chuan Nilaini khan a sawi.
Sanghavi chuan thil tidik lotute laka thu rem a nih vat theih nan ni 10 chhungin police hian charge sheet an thehlut ang a, sorkarin he thubuai buaipuitu tur Special Public Prosecutor a ruat dawn bawk tih a sawi.
He thil thlengah hian mi 15 man an ni tawh a, an zinga mi pakhat hi bawlhlo ngaihtuahtu ber nia hriat a ni a, mi dangte hi zu hralh kualtute an ni bawk tih minister chuan a sawi.
Botad leh Ahmedabad police chuan Thawhlehni khan mi 20 dawn lakah Indian Penal Code Section 302 (murder), 328 (causing hurt by poison) leh 120-B (criminal conspiracy) hmangin FIR pathum an ziak lut a ni.
Police-in an chhuinaah chuan mi pakhat, Jayesh an tih, Raju tia an koh bawk chuan Ahmedabad-a manager nia a hna thawhna kudam pakhat atangin methyl alcohol litre 600 zet a ru chhuak a, Botad-a a unaupa (cousin), Sanjay-a hnenah July 25 khan Rs. 40,000-in a hralh a ni.
He thil hi industry-a hman chi, bawlhlo hlauhawm tak a ni tih hre reng chungin Sanjay-a hian Botad-a khaw hrang hranga zu siam thinte hnenah a hralh a. Zu siamtute hian tui nen pawlhin rakzu tiin mite hnenah an hralh ta niin police chuan an sawi.