India ramah darkar 24 liam ta chhungin coronavirus kai mi 13,734 hmuh chhuah leh hman an ni.
Hri kai hmuh chhuah tharte nen hian India rama COVID-19 kai chu mi 4,40,50,009 an ni ta tih union health ministry chuan a tar lang.
Darkar 24 liam ta chhung hian mi 34-in Covid hi thihpui leh hmanin mi 5,26,430-in an thihpui tawh.
Hri kai enkawl lai tlahniam leh hretin mi 1,39,792 an la awm mek a, a kai hmuh tawh zawng zawng atanga chhutin 0.32% a ni mek a, 98.49% chu enkawl dam tawh an ni.
Darkar 24 liam ta chhung hian a kai hmuh thar aia enkawl dam an tam zawk avangin enkawl lai hi mi 4,197-in an tlahniam leh hman a ni.
Darkar 24 liam ta chhunga sample endik zinga 3.34% chuan hri hi an kai tih hmuh chhuah niin chawlhkar khat liam ta chhunga endik zinga 4.79%-in an kai bawk tih health ministry chuan a tar lang.
Covid kai zinga mi 4,33,83,787 chu enkawl dam an ni leh tawh a, a kai zinga 1.20%-in an thihpui tawh bawk.
Ministry-in a chhinchhiah dan chuan invenna dose vaibelchhe 204.6 pek tawh a ni.
Darkar 24 liam ta chhunga India-a Covid thihpui zinga paruk hi West Bengal-a mi a ni a, Himachal Pradesh-ah mi pathum, Delhi, Goa, Karnataka leh Punjab-ah mi pahnih theuh; Chhattisgarh, Gujarat, Haryana, Jammu & Kashmir, Maharashtra, Meghalaya, Nagaland, Odisha, Pondicherry leh Uttarakhand-ah mi pakhat theuh an ni.