United States chuan al-Qaeda hruaitu, Ayman al-Zawahiri chu drone hmangin Afghanistan-ah an that tih President Joe Biden-a’n a puang.
CIA-in Pathiannia Kabul khawpuia firfiak beihpui an thlaknaah an that a ni.
Osama Bin Laden nen 9/11 attacks kha an ruahman a, America-in mi firfiak a man duh ber zinga mi a ni.
Biden-a chuan al-Zawahiri hi ‘American civil mite thahna bultumtu leh an laka tharum hmangtu’ tiin a sawi.
“A birukna atangin al-Qaeda pengte a dawr a, beihna an thlen dan tur a ruahmanpui a, US bei turin mite a hmin thin,” tiin White House atanga TV-a live-a thuchah a sawiah president hian a sawi.
“Tunah chuan dikna hlen chhuah a ni ta a, he firfiak hi a awm tawh lo,” a ti.
FBI-in Thawhtannia Most Wanted Terrorist poster an tihtharah pawh Zawahiri-a hi ‘boral tawh’ tiin an dah.
Kum 71 mi, Egyptian doctor hian kum 2011-a bin Laden-a a thih atang khan al-Qaeda hi a hruai.
Biden-a hian thla eng emaw zat chhung ruahmanna siama an beih hnuah ‘kap turin’ a ti ta a ni.
Thuneitute chuan Zawahiri-a hi a in him takah a bathlara a awm lai kah a ni a, he hmunah hian rei tak a thu thin a, drone hmangin missile pahniha kah a ni.
A chhungte pawh inah hian an awm a, amah tih loh mi dang chu an him vek niin an sawi.
Biden-a chuan Zawahiri-a thah a nih takah hian kum 2001-a mihring phur thlawhna hruai kawia New York leh Washington-a in langsar tak tak sut chima thi mi 3,000 dawngte chhungte rilru a dam thei dawn ta niin a sawi.
Thlawhna hruai kawia in sut chimah hian kangthelhtu 344 an thi bawk a. New York Firefighters Association President Andrew Ansbro chuan Biden-a chu lawm thu hrilhin beihna tuartute hahdama an awm thei tawh dawn thu a sawi.
Biden-a chuan Zawahiri hi October, 2000-a Aden-a USS Cole naval destroyer beih, lawng sipai 17 an thihna bakah kum 1998-a Kenya leh Tanzania-a US embassy beia mi 223 an thihnaah pawh ruahmanna siamtu niin a sawi bawk.Tu nge al-Qaeda hruai ta ang?
Zawahiri a thih takah hian zawhna lian ta ber chu al-Qaeda hruai tur hian tu nge Zawahiri thlak ang tih a ni.
A aiawh tur zingah hian Saif al-Adel, Abdal-Rahman al-Maghrebi leh al-Qaeda (Islamic Maghreb (AQIM) hruaitu, Yazid Mebrak bakah al-Shabaab hotupa, Ahmed Diriye te chu hming langsar te an ni a. Tumah tihchian erawh engmah a la awm lo.
UN Security Council-in July 15, 2022 a report a pek danin Taliban-ten Afghanistan an thunun leh atang khan Zawahiri dinhmun pawh hi a tha hle nia ngaih a ni a, al-Qaeda dinhmun pawh Afghanistan inkaihruaina hnuaiah hian a tha viau ang nia hriat a ni bawk.
Taliban-te hi an dinhmun avangin chet harsat viau tawh mah se, khawvel pum huap anga che tur chuan al-Qaeda hi dah san zawk an ni a. Taliban sorkarah hian adviser hna an thawk a ni ber a, an inkar pawh hi tha viaua ngaih a ni.
Aiman Muhammed Rabi al-Zawahiri hian tun hnaiah al-Qaeda tantute hnenah video leh message a thawn hnem hle a, a thuchhuakah ngei pawh al-Qaeda chu ISIL tluka thuam a nih tur thu a sawi a, hei hi khawvel huap hruaitu a nihna a tihlanna pakhat niin UNSC report chuan a tar lang.
al-Qaeda hian Afghanistan-a Taliban-ten ro an rel hnu hian zalenna zau zawk an nei a; mahse, an dinhmun dik takah erawh an buai a. India leh a chhehvelah AQIS tih a hriat lar niin fighter 180-400 vel an nei a, anni hi Bangladesh, India, Myanmar leh Pakistan mi leh sa an ni ber.