Faina hi nunpui reng tur zawk kan ni dawn lo’mni?
Faina Hapta chu a kharna hun hman a ni hlawm ta a, faina hapta kan hman hian a hnu zelah pawh hmasawnna thlen zel thei se a duhawm thin hle. Lawmman hrang hrang semchhuahte pawh hmasawn zel zawk nan hman nise a duhawm khawp mai.
‘Faina Hapta’ pual hian Mizoram hmun hrang hrangah sorkar leh tlawmngai pawl angte’n hmalak a ni tawh thinin, faina kawnga inzirtirnate neih ni thin mah se, kan khawpui leh Mizoram khua tam zawk te dinhmun thlirin hmasawnna tur erawh kan la ngah hle.
Sorkar pawhin faina kawngah tan nasa takin a la a, veng leh khua fai ber thlanna te neiin theihtawp a chhuah tak meuh tih pawh phat rual a ni lo. Amaherawh chu, he’ng faina lawmman la veng/khua te atanga ngaihtuah chian chuan tan lak a la ngai nasa hle tih a chiang a. Veng leh khua fai ber lawmman la te pawh kum danga lawmman la te tho an ni duh hle. Hei hian hma sawn lo tih a kawk mai ni loin, dinhmun ngai renga din chu hnungtawlhna a ni an tih ang deuh kha a ni ber awm e.
Faina kawngah hian inzirtirna pawh kan nei tam tawh hle a. Fai hi mipui leh ram hriselna atana a pawimawhzia pawh mi tam zawk chuan kan hre tawh ang. Chutih laiin, kan khawsazia, kan nundan thlir hian fai hi kan duh tak tak lo emaw ni chu aw tih ngaihdan te pawh a awm thei hial. Bawlhhlawh hi amah maia rawn awm ni loin, a siamtu awm a ngai a, chu chu mihringte bak puhmawh tur an awm hauh lo a ni.
Hun lo kal lehzel turah pawh ‘Faina Hapta’ hi kan la hmang zel dawn niin a lang a. Tuna a lan danah leh he hapta kan hman tawh thin dan te thlirin nakkumah pawh tawngkaa fai pawimawhzia inhrilh leh ringawtah kan duhtawk ang tih a hlauhawm hle. Hapta khat chhung chauha fai inzirtir leh ngai pawimawh lo hian, kum tluana fai hi nunpui dan zawk kawng kan inkawhhmuh tam a pawimawh hle.