Aizawl : PC party Vice President Lalrinmawii Fanai-in Brig T Sailo hova duan, Mizoram hmasawnna tur policy ‘Six Basic Needs’ chu a duangtu ten Pathian aṭanga an dawn nia sawiin, “tun thlengin a la nghing lo” a ti.
Lalrinmawii chuan PC party-in hun thar an chuangkai ṭan nia sawiin, an hruaitu hmasa ten Sam 15-na chhiar chhuaka theihtawpa nunpui an lo tum ṭhin avanga zahna chibai a buk thar leh thu a sawi a. Midang tawngpawng sawichhiatte a that loh thu sawi- in, “mi sual hmuhsit ngam te, Pathian ṭihtu chawimawi te, chhechhama thu tiam tawh sut lo tur te, rorelna dik leh dan dik taka kenkawh te PC party chuan kan ngai pawimawh hle dawn” a ti.
“Kan ram hnuk, Six Basic Needs pianna leh tihhlawhtlin tumtu awm chhun party-ah ngei, PC lo ni tawh ṭhin hmun danga kal tawh te leh politics ngaihven tawh lo zawng zawng te, lo che chhuaka lo tel ṭheuh turin ka sawmin ka ngen a che u, a ti bawk.