Ukraine-in Nato hnuaia a thurualpuite chuan Russia-in nasa zawka a kah mek laiin van sang lama invenna hmaruain Kyiv a pui leh dawn.
UK, Canada, France leh Netherlands ramten ralthuam an pek tur zingah hian missile leh radar pawh a tel a. A hmain US pawhin hetiang hian puih a lo tiam tawh a. Germany-in ralthuam tha tak a pek chuan Ukraine a thleng tawh bawk.
Nato headquarters, Brussels khawpuia Ukraine lama tang ram 50-te an thutkhawmnaah hian puihna tur hian thu an titlu a ni.
Kyiv chuan he thil pek tur hi a lawm thu a sawi.
UK chuan air defence missile a thawh dawn a, hei bakah hian Ukraine-in thu pawimawh a dawn leh hmanrua a pek kualnaa a hman mek puitu tur aerial drone a pe dawn bawk a. A hmaa howitzer artillery gun 64 a pek tawh bakah 18 dang a pe leh dawn bawk.
Defence Secretary Ben Wallace chuan, “Russia-in tun hnaia nasa taka Ukraine-a mipui chenna a kah leh lai hian an ram humna tura puihna an mamawh belh hle a ni,” a ti.
“Heng ralthuamte hian Ukraine chu vansang lamah a vang thei ang a, missile laka invenna pawh a pe dawn a ni,” a ti.
Nilainia Brussels-a thutkhawm zawh hnuah US Defence Secretary Lloyd Austin chuan, “Ukrainian-ten an hman tangkai tura an mamawh apiangah kan tih theih a awm chuan tihsak zel kan tum a ni,” a ti.
French President Emmanuel Macron pawhin Paris atangin Ukraine atang hian air defence system an thawn luh tur thu a sawi.
France 2 television-in an kawmnaah eng hmanrua chiah nge an pek dawn chu a sawi lo va; mahse, an tum ber chu drone-a beihna laka mipui venhimna hmanrua a nih thu a sawi.
Netherlands pawhin £ maktaduai 13 man hu vansang atanga missile-a kahna laka invenna a pek tur thu a sawi bawk.
Dutch Defence Minister Kajsa Ollongren chuan Russian-ten an beihna chu Ukraine leh an mipuite himna ngaihtuaha chhan let chauh tih theih a awm thu a sawi bawk.
Canada pawhin sipai lam thilah $ maktaduai 34 man hua an puih tur thu a puang a, heng zingah hian satellite communication leh drone camera pawh a tel a ni.
Hetih lai hian Ukraine sipaite chuan Nilaini khan Germany atangin IRIS-T SLM an pek tur an dawn thu an puang a. He hmanraw hmang hian an ram chu ‘mi firfiakte lakah’ chak zawkin an veng thei dawn niin an sawi.
President Volodymyr Zelensky chuan thla eng emaw zat kal tawh atang khan Ukraine thawhpuite hnenah hian an ramin boruak atanga beihna laka invenna a mamawhzia a lo hrilh tawh hlawm.
Nilaini zana thu a sawiah Ukrainian hruaitu chuan, “Russian firfiakte an chet nata an rorum tawlh tawlh lai hian khawvel hian Ukraine himna turin vansang lama invenna a mamawhna chu Europe khawmualpui a san lai ber a ni,” a ti.
“Heng rumthaihna hi kan do zawh ngei ka ring,” a ti bawk.
Hetih lai hian Russia chuan Ukraine thawhpuiten Kyiv hnena puihna an thawn chu duh lovin a vau chhunzawm zel a. February 24 atanga a rûn hnuah puite hi indonaa inrawlh ve leh an ram hmelma angah a chhuah.
Khawthlang ramte chuan Moscow hian tun hnaia an sipaiten indonaa ram eng emaw zat an chân hnuah nuclear hman a châk hle tawh niin an sawi ve mek bawk.