Nepal hmarthlang lama bus chesualah a chuang mi 28 vel an thi a, mi dang eng emaw zatin hliam an tuar bawk niin police chuan an sawi.
Bus hi Mugu district-a tlan a ni a, Thawhlehni chhun lai velah khan tlang kham khawkrawk takah a tlan liam niin tual chhung chanchinbute chuan an sawi.
Chetsualna thlen chhan hi hriat a la ni lo va; mahse, mi thenkhat chuan a brake lamah felhlel a awm sa niin an sawi.
Nepal-ah hian lirthei chesual hi a tam hle a, kawng a chhia a, lirthei enkawl uluk loh a tam bawk avangin a tam phah zual hle.
Tual chhung chanchinbuten thlalak an tihchhuahah chuan chhanchhuah hna thawktuten ruang leh hliam tuar an la chhuak lai te, an bungrua an senghawi laite pawh a lang.
Police chuan an chhui chiang mek.
Bus-a chuang tam zawk hi Nepal leh India-a sakhaw kûtpui pakhat, Dashain an tih an hmang zo, an khaw lama haw leh tur an ni.
Hliam tuar tam tak chu damdawi inah laka enkawl an ni a, thenkhat, a na zual chu damdawi inah helicopeter hmanga phurh an ni bawk.
Bus-ah hian mi engzat nge chuang tih hriat chiah theih a ni rih lo va; mahse, police chuan hliam tuar zingah dinhmun tha lo tak tak an awm avangin thi an awm belh a rinawm an ti.