Aizawl: ZPM Leader Lalduhoma’n ram politics vir vel thlir hian Zoram mipuiten innghahna an neihchhun chu ZPM party nia a lan thu a sawi.
Champhai leh a chhehvel khuate fanga zin mek ZPM Leader Lalduhoma leh ZPM Working President K Sapdanga ten nimin khan Ngur khua tlawhin vantlang inkhawm an buatsaih a. Thusawitu, Lalduhoma chuan ram dinhmun ngun taka thlirin kohhran pawh a mangang tawh tih a sawi a, “Kumin Presbytery Inkhawmpuiah chuan sorkar inrelbawl dan hawi zawngin agenda pass a awm nual a ni. Kohhranten ram an vei a, kan ram leh hnam tun din thar leh an duh a, chu chu Bible atangin a dik si a ni,” a ti.
Thenkhatin ZPM sorkar an chak chhan chu ram leh hnam an vei vang pawh ni lo, ei ruk tumna rilru pu chunga ram rawng bawl duh vang tih sawi thin mah se, kalphung thar hmanga ram intodelh an hlauh vang niin a sawi a. ZPM policy chu bultan thei bultanna nei si loten bul an tan theih nana an bana kaih a nih thu sawiin, “Mipuite bana kai tur leh ram siam tha turin politician-te an pawimawh em em a, chutiang tur chuan ZPM hi a inpeih tawh a ni,” a ti bawk.
ZPM Working President K Sapdanga pawhin thu sawiin, nakkum MLA inthlanah duhthlanna fim tak hmanga chhia leh tha hriatna thlianghlim tak nen vote thlak turin mipuite a ngen a. Thluaka sum lut hi mipuiin an vei ve ang tih hi an party chuan an hlau ngawih ngawih tih a sawi a. Candidate-te sum leh pai dinhmun en chunga mipuiin inthlan an hmachhawn chuan thluaka sum lut a vei ve anga an ngaih thu a sawi.
ZPM Leader leh Working President te hi General Headquarters leh Champhai North Block hruaitu eng emaw zatin an tawiawm a. He hunah hian TBC Lalvenchhunga, PAC member pawhin thu a sawi bawk a ni.