Aizawl: Shillong-a Zohnahthlak sipai bangten BJP National Executive Member Minority Morcha, BJP Mizoram in-charge ni bawk, Elizabeth Nongbri hnenah Zohnahthlakte harsatna leh mamawh hrang hrang an thlen.
Mizo Ex-Servicemen Association buatsaihin nimin khan Shillong-ah Zohnahthlak Ex-Servicemen intawhkhawm neih a ni a. Nongbri-i’n a hmanpui a, Shillong-a Zohnahthlak unauten an harsatna an tawh mekte sutkiansak dan ngaihtuahsaka thawhhona tha bakah in leh lo leh an fate sikul kalna tura tanpuina awm theih dan kawng zawnsak turin an ngen.
Mizo Ex-Servicemen building-a hun hmanah Nongbri-i chuan Mizoram viltu a nih angin leh BJP chu Mizote leh Mizoram tana awm a nih angin, India rama Mizote leh Zohnahthlak awmna state apiangah an harsatna tawh mekte sutkian sak a, tanpui an ngaihna zawnah tanpui dan tur kawng a dap zel thu a sawi a. Shillong-ah Sainik School din a nih theih nan hmalaknate pawh a sawi lang.
Sub. D. Ngampu, President, Kuki Ex-Servicemen Association kaihhruai inkawmnaah hian Zohnahthlak hnam peng hrang hranga sipai bang te an tel kim hle a ni.