Aizawl : PC President Vanlalruata’n Policy chungchang debate-ah party dang a cho.
Vanlalruata chuan “Opposition party ten economic policy kan tlangzarh ta hlawm a, party dang policy hi chu kohhran leh mithiam ten tha lo an tih, ‘sem policy’ tia sawi thin ang chi kha niin a lang a, kan policy chiah hi ram dinchhuahna turah ka ngai” a ti a. “Mipuiin thu dik an hriat theih nana policy debate neihpuiah party dang te hi ka cho a ni,” a ti.
PC party President chuan sorkarin a tih tur pawimawh ber chu ram economy chawikan a nih thu sawiin, “Tuna sorkar lai MNF hian an economic policy chu SEDP vuaha an kalpui rualin, hei hian kan economy a chawikang dawn lo tih a chiang tawh,” a ti a. PC economic policy, ‘khawl hnuh hmasawnna : mitin tan in leh hna’ tih chu ram hmasawnte hlawhtlinna kalphung zuia siam a nih thu a sawi.
Vanlalruata chuan Indopui pahnihna zawh hnua ram hmasawn chak tharte chu tuna an party policy anga an kal avanga hmasawn chak nia sawiin, India ram hmasawnna pawh hetiang kalphung an hman atanga chak ta niin a sawi a. Mizoram dinchhuah nan PC policy tihhlawhtlin ngei a ngai niin sawi.
Opposition party dang economic policy tlangzarh chu sem policy, ramin a dinchhuahpui theih loh tur, mi tlemtein an hlawkpui leh tur chi nia a ngaih thu PC party President chuan a sawi a. Mipuiin party hrang hrang thil tum an hriat chian theihna tura policy debate neih a tul thu a sawi bawk.