Belgian team Club Brugge in an goal venhim an thiamzia an lantir leh a. Spanish team tha Atletico Madrid chu dang tluanin an inhnehtawk a, UEFA Champions League knockout stage an lut.
Nilaini zanah UCL group B inkhelah Brugge hian inkhel tawp dawnah red card an hmu chungin Atletico hi 0-0 in an chelh a. Madrid a Wanda Metropolitano a inkhelah point pawimawh an hmu.
Mualneitu Rojiblancos in goal khungna huntha insiam nual mahse an khung thei lova, chance tha an hloh hnem. Goal an khung theih loh vang hian UCL-ah a zawnin vawi thum chak hmel an hmu tawh lo. Khelh hnih la hmabak mahse an tan tlak theihna lian tak a la awm ve tho.
Barcelona atanga lakluh ngheh Antoine Griezmann chuan inkhel bul tan mahse France striker in goal a khung thei lo. Chance tha tak erawh neiin ani bakah Alvaro Morata ten an team an chakpui teuh.
Brugge goalkeeper Simon Mignolet chuan record a siam bawk a. Save tha tam tak siam leh bawkin UCL-ah a zawna goal a venhim vawi li-na a ni a. Tun group stage-ah goal khat mah an la chhuah lo.
Atletico hian kum 2017-18 hnua a vawikhatna atan UCL group stage paltlang loh mai an hnaih a. Beiseina nei turin an tum leh tur Bayer Leverkusen lakah an chak a pawimawh tawh dawn.
Brugge goalkeeper Mignolet chuan, “Mumang ang mai a la ni zawk. A tawp thlengin kan bei a, a hlawhtling zawkah kan tang. Kum dangah pawh theihtawp chhuahin kan bei thin a, mahse kan vanduai tum a thleng leh thin.”
“Kuminah pawh beiseina sang tak kan nei a, tlin theih kan inbeisei hle hnuah tunah kan tumah kan hlawhtling. Kan zinkawng hi chhunzawm zel kan duh a, a thui thei ang ber kal kan duh.” a ti.
Inkhel dangah FC Porto pawhin an dinhmun an siamtha a, pahnihna a awm turin Leverkusen 3-0 in an hneh.
BayArena a inkhelah Porto tan Galena chuan goal khungin Mehdi Taremi chuan penalty atangin vawi hnih a khung ve bawk.