An ram lamah Liverpool in beisei ang result nei lo leh thin mahse Europe huap inelna lianah erawh a zawna vawi thum nan hnehna an chang. Scottish club Rangers lakah goal sarih khungin 7-1 in an chak.
Nilaini zana Ibrox Stadium a inkhelah tunhnaia goal a khung tam tawk loh avanga sawisel hlawh leh thin Liverpool forward Mohamed Salah chuan substitute bench atanga dah luh a nih hnuah hattrick a siam. Rangers fans ten thawm tha tak nen an team tawiawm mahse Liverpool in goal an khung tak nghek hnuah a tawp lama an thawm a chuai tawh hle.
Scott Arfield hmanga minute 17-na a goal hmahruai an khung phei chuan stadium chhung thawm a ring tak zet. Mahse hma an hruai rei lo. Minute sarih a liamin Liverpool tan kheltha tak Roberto Firmino chuan an si phurh a sut.
Second half tan hnu lawkah Firmino bawkin an goal hnihna a khung a, Joe Gomez-a thawhrah a seng.
Reds in an goal hnihna an khung hnuah chak tur zawk a chiang viau a, kawng engkimah an chungnung. Nemnghet turin Firmino thawhrah atangin Darwin Nunez chuan minute 66-naah an goal thumna a khung.
Salah-a’n minute 75-na, 80-na leh 81-naah te goal khung chhunzawmin huntawp hma in Harvey Elliot chuan an goal hnuhnung ber a la khung leh hman bawk.
Liverpool manager Jurgen Klopp chuan inkhel zawhah, “Halftime kan hmang tangkai a, second half-ah khan insiamthat kan tum hle. Kan duhthusam ang takin thil a thleng.”
“Kan goal khungte goal tha vek a ni. Zaninah kan tum angin thil a kal tluang vek. Pathianni a Manchester City tum tur kan nih angin kan tana boruak tha siam tur result kan nei. Chutihrualin inkhel erawh a danglam hle dawn. Mahse boruak tha tak nena kan inbuatsaih thei tur hi a lawmawm.” tiin a sawi.
Barca tla teuh; Bayern an tling tawh
A zawna season hnihna atan Barcelona in UEFA Champions League group stage an pel zo lo thei mai dawn a. Inter Milan nen an inhnehtawk avangin an tan khelh hnih an la hmabakah chak ngei ngei a ngai tawh a. Inter Milan result-ah an innghat tel.
San Siro-a an tlawm hnuah an mualah Inter Milan an mikhual a. Xavi Hernandez-a pawlte leh Italian club hi 3-3 in an inhnehtawk.
Barca tan Ousmane Dembele chuan goal khung hmasa mahse Nicolo Barella chuan Inter tan a sut. Lautaro Martinez hmanga hma hruai ve lehin Barca in Robert Lewandowski hmangin an sut ve thung a. Robin Gosens in Inter goal thumna a khung a, Lewandowski bawkin an si phurh a sut.
Barcelona hian Bayern Munich leh Viktoria Plzen an la tum dawn a. German club an tlin chian tawh avangin Inter Milan in October 26 zana Viktoria Plzen an hneh chuan Barcelona an tling thei tawh lo.
Hetihlai hian Bayern Munich hi a zawna season 15-na atan Champions League knockout stage khel turin an tling a. Viktoria Plzen lakah goal li an khung.
Bundesliga lamah tunhnaiah che tha tawk lo mahse German champion in UCL-ah match li atanga vawi li nan hnehna an chang a. An goal li khung hi a tir minute 35 chhunga an khung niin Leon Goretzka chuan goal hnih a khung a. Sadio Mane leh Thomas Muller ten goal dang pahnih an khung.