- Reuben Lalnunthara Hnamte
Mizote hi danglaman riau kan nei a, hmelah chuan anpui chu kan ngah viau a. Khawchhak lam mi te leh India ramah ngei pawh Northeast lamah hian kan anpui chu an tam khawp mai. Hmelah chuan anpui chu ngah mah ila, kan hnam nunphungah erawh hnamdangin an neih ve loh neih leh chin than kan nei nual a. Chungte chu kan pi leh pute hunlai atanga kan lo chin leh tun thlenga kan la inzirtir thin te a ni. Chungte chu tawi te te in in zirho teh ang :
Tlawmngaihna : Tlawmngaihna tih thumal hi saptawngah chuan a tlukpui ka hmu hauh lo mai a. Mizo ten kan chian em em laiin, a tlukpui tur tawngkam hi a vang hle. Mahni inphat tih te, midangte tana inpek tih te pawh hian a hrilhfiah zo chiah pawhin a lang lo. Meirion Lioyd Missionary chuan mizote min hmuh dan tihian a sawi ‘’Mizote chungril nun leh innghana tha leh mawi em em chu an tlawmngaihna hi a ni ‘’ a lo ti. He tawngkam ril tak hi mizote kan danglamna leh, kan pi leh pu te lo ropuina em em leh mizo nun leh khawtlang tipumkhata, tinuama, timawitu chu a ni. Kan mizo pasaltha tlawmngai thenkhat zingah Taitesena hi tlawmngaihna kawngah chuan kan sawi hmaih thei lovin, tlawmngaihna lalpa tih hial pawhin sawi ila kan uar lutuk lo ang chu maw. Tunlai hunah pawh hian he kan mizo nunzia hi chawinung tumin YMA lam te pawh hian inzirtirna leh a taka thawkin an kengkawh tha hle mai.
Lal Isua khan tlawmngaihna nun kha a nun pumpuiah kan hmu a. A zirtirna leh a thupekte hi mizo tlawmngaihna kan tih nen hian a inmil hle mai. Chumi zuitu keini ringtute chu kan tlawmngai tur a ni a, Kristian nun nen pawh hian a inhmehin, thil inzawm tlat a ni. Ziaktu pakhat chuan ‘ Kristian kan nih hma pawhin he tlawmngaihna hi chanchin tha(the hidden gospel) a ni a’’ lo ti hial a ni. A huhova tlawmngaihnaah hi chuan kan thawk tha in, kan ti tha tlangpui a. Mahse, mimal taka tlawmngaihna nunah hian kan tlachhe mek thung. A mimal taka tanpui ngai ni a kan hriat han puih mai te, kawng kan kal lai a chaklo zawkte leh inphur bawr em em han puih mai te, mi puanpho tla han chharsak maite thleng hian kan uar thar a pawimawh hle. Fak leh chawimawi phut hauh lova mi han tanpuite hi tlawmngaihna nu leh kristian nun ze mawi chu ava ni em!
Aia upa zahthiamna : Aia upa zahthiam tih pawh hi hnamdang hian an inzirtir meuh em chu ka hre hauh lo mai. Mizote ah erawh chuan kan pi pute thil ngaihpawimawh leh an kenkawh tlat nun a ni. Mizo thangtharte zingah aia upa zahna a tlahniam nasa hle. Aia upate zah hauh lova, kutthlak duh leh ankhum bawng bawng duhte kan pung ta zel a.
Lehkha zir sang tak kan ni emaw, awfisar lian tak, leh mi hausa tak kan ni emaw pawh ni se, he kan mizo nunze mawi aia upa zah thiam hi kan mizo nun zemawi ropui tak a ni.
Aia upate zahthaimna mizo nun ze mawi tak tidaltu pakhat chu kan social media Facebook, Instagram, twitter, whatsapp etc. te hi an ni a. Aia upate thu post an lo comment duh danahte hian aia upa zahna tlachham fe fe an kat ta nawk mai a ni. City Bus chhungahte thalai thenkhat mahni aia upate zahthiam taka thutna han kian mai thin an awm laiin, thalai leh naupang thenkhat chutiang nachang hre miah lo, a bikin school uniform ha te zingah awn awm nawk thin te hi kan mizo nunmawi kan kalsan tawh sia tichiangtu pakhat a ni. Zirtirtute pawh hian an naupangte hi mizo nunze mawi hi zirtir fo se a tha hle mai.
Mizo ram pawnah kan awm emaw, mizo awm tamlohnaah kan awm emaw pawh nise, he kan mizo nun zemawi hi thlahthlam lovin chawinung zel ila; mizo nih hi zak lo ila, kan hnam nun ze mawi hi kan chawinun poh leh keimahni pawh kan mawi a, mizo kan chawimawi bawk. Israel fate ho khu an hnam nunzia leh sakhua chawinun kawngah chuan an entawntlak hle. An saltanna hmunah te, hnamdang awmna zingah pawh an Juda em em zel mai a ni. Keini pawh hi khawiah pawh awm ila, mizo em em mai ila, kan mawi zawk. Engtikah mah Sap, Korean etc. kan ni dawn lo, mizoah kan lo pianga, mizo niin kan boral leh dawn. Mizo nih hi khawiah mah zahpuilo ila, kan hnam nunzia leh Kristianna hi i chawinung zel ang.
Rinawmna : Rinawmna hi kan mizo nunzia a bet tlat thin a ni. Hmanlai chuan kawngka an kalh ngai an ti lo, rukru an awm ngai lova, an inring tawn em em , khawtlang nunzia a mawi thin. Kutkem nei tihte kha an hmusitin an deusawh em em thin a ni. Tunah chuan kutkem tih satliah chu a nep ta lutuk engmah kan ngai vak lo. Mahni in chu sawi loh, Biakin hial thlengin kalh that ngaiin fimkhur angai ta em em a ni. Kristian ram si ah hian tumah hi kan inring zo ta meuh lo chu a ni e.
Tunah zawng meng reng chungin kan inbum a, a thaibo theih theih kan thai bova, Pathian thu meuh pawh hian min ti rinawm zo ta lo emaw tih tur a ni ta. A langa rukru leh lang lo lama nuaih tel ru te nen Biakin leh khawlaiah pawh kan inpel ta suau suau mai zawng a nih hi. Kan mizo nunze mawi thin kan hlauh nasat ber zinga mi chu rinawmna hi a ni. Kristian kan nih hnuah phei chuan rinawm zawk awm tak, kan kristianna leh kan ringtu nihna hian rinawmna lakah hian awmzia a nei ta lo emaw tih hial tur a ni.
Mizo hnam incheinaa inchei a, intih mizo em em a lam dual dual ringawt hi a tawk ta lo; kan mizo nunze mawi kan danglamna zia- Tlawmngaihna, aia upa zahthiam leh rinawmna te hi i chawinung zel zawk teh ang.