Tu emaw talent hrang hrang nei tha tak, engpawh ti se, awlsam leh hahdam taka tizung zung nghal thei i tawng tawh ngei ang. Sikkim nula Eksha Hangma Subba hi sawi hmaih a thiang lo.
Kum 21 mi lek a ni a, police officer, supermodel, bike leh boxer hriathlawh a ni pha tlat. Rumbuk khuaa piang leh seilian hi a hun hmasa lamah combat sports hmelhriat chhovin, an khuaa boxing training an neih chu a hlawkpui zui nghal hle.
Kum 2019 khan Sikkim Police hna a zawm a, Sikkim anga state lian vak lova sorkar hna chelh chu thil hlu tak mai, chhungkua ang pawha innghahna thlak a tling reng a, tunah pawh hian chhungkaw chawmtu ber leh an innghahna a ni.
“A tir lamah kha chuan, ‘Eksha, engnge maw i buaipui le’ tiin ka inzawt fo mai a, tunah erawh chuan vannei ka inti hle. Police leh model ka ni kawp a, mite pawh hian min ngaina hle in ka hria,” a ti.
Model lamah pawh hnuhma a nei nual a, a mikhual lo. MTV Supermodel season hnihna ate khan inlanin, top 9-ah a langpha. Modelling lam a hawi hian a nihna dik tak a hmuchhuak thin a, duty-naah erawh ram tana fanu rangkachak a nihna a chhuang hle thin bawk. Biker hriathlawh a ni a, mipa huaisenin an tih theih te pawh zam map lova tawn ve bawrh bawrh thei, adventure ngaina tak, a huna nu hnap mai, a tul huna ‘pa’ rem rem tak ni bawk si hian social media lamah a chanchin leh thlalak ngaihventu an tamin, an share nasa hle a ni.