Indonesia-a naupang 100 dawn thihna avangin an ram sorkar chuan damdawi tuihnang chi leh tuiril chi hralh chhuah khapna a tichhuak.
Chawlhkar tam vak lo liam taah khan Gambia ramah khuh damdawi ei avangin naupang 70 dawn an lo thi tawh bawk nia sawi a ni.
Indonesia-ah hian damdawi tuihnang chi thenkhata bawlhlo telte chuan kal natna, acute kidney injury (AKI) a thlen thei nia hmuh a ni a, hei hi kuminah ringawt naupang 99 zetin an thih phah tawh.
Heng damdawite hi anmahni siam nge ram pawn atanga an chawk luh tih erawh hriat a la ni lo.
Ningani khan health thuneitute chuan AKI nei hi naupang 200 vel an awm thu leh a tam zawk hi kum nga hnuai lam an nih thu an sawi.
Tun thla tirah khan World Health Organization (WHO) chuan Gambia-a naupang 70 dawn thihna chu khuh damdawi pali nen inzawmna nei niin an lo sawi tawh bawk.
WHO chuan heng damdawi, India-a damdawi siamtu company-in an siamah hian diethylene glycol leh ethylene glycol ‘tam tham tak’ a tel thu a sawi a. Heng damdawite hi ‘AKI thlentu an ni thei’ niin an sawi a ni.
Indonesia-a health minister chuan Ningani khan an ram chhunga damdawi an siamahte hetiang bawlhlo tho hi tam tham tak hmuh a ni tih a sawi.
“Damdawi tuihnang thenkhat hi AKI nei naupang kum nga hnuai lam damlote hian an ei ngei a, a awm lo tur ethylene glycol leh diethylene glycol hi a tam lam hret a awm ngei a ni,” tiin Budi Gunadi Sadikin chuan a sawi.
Damdawi engzatah chiah nge hetiang thil him lo hi a awm tih erawh a sawi lo thung.
Indonesian thuneitute chuan Gambia-a hman ang khuh damdawi ang chi chu an hralh ve loh thu an sawi bawk.
Epidemiologist pakhat chuan thi zat hi tuna mi ai hian an tam thei niin an sawi.
“Hetiang thil angah hi chuan a lang chin hi vur tlang chhip ang deuh a ni a, a thihpui hi an tam viau thei a ni,” tiin Griffith University-a epidemiologist Dicky Budiman chuan a sawi.
Indonesian thuneitute hian eng damdawi chiah nge heng naupangte hian an ngeih loh an sawi lo va; mahse, damdawi tuihnang leh tuiril ang chi chu hralh khap lailawk a ni tih erawh an puang thung.