Mizo Students’ Union (MSU) huaihawtin Aizawl khawpui chhunga sorkar enkawl college zirlai thahnem takin nimin khan sorkara admission leh tuition fee chhunluh duh loh lantirin, ‘College hmasawnna hnatlang’ an nei a, an phut angin zirlaite sum chawi chu an college enkawlna atana hman tawh turin sorkarin a pawmpui.
College zirlaite hi nimin chawhma dar 10 vel atang khan Vanapa Hall tualah pungkhawm tanin an thil phut chungchanga MSU hruaitute leh sorkar hotute indawr chu an ngaichang a, an thil phutte tihhlawhtlin ngei an phut thu te an aupui a ni.
An beisei anga thu lawmawm an dawn mai loh avangin tlai dar 4 vel khan Vanapa Hall tual atanga kawng zawh tanin chief minister office kawtah an pungkhawm leh a, vawi tam tak sorkar an lo ngen tawh admission leh tuition fee sorkara chhunluh thin chu titawp ngei tura an phut thu an aupui leh.
Darkar khat chuang sorkar thu an ngaihchan hnuah zirlaite hnen atanga lak thin admission fee chu sorkarah lut tawh lovin college inenkawlna atana hman chu sorkarin a remti a, chief minister-in a pawmpuina thu an dawn hnuah zirlaite chu tlai dar 5:30 khan an tin darh ta a ni.
Zirlai rual pungkhawmte hmaa thusawitu MSU hruaitute chuan sorkar awm tawh zawng zawngah college zirlaiten admission fee Rs 1,320 sorkarah an chawi thin chu tha an tih loh thu a sawi a. Kum 2013 atang khan tum li lai sorkarah an lo thlen tawh thin tih sawiin, MSU-in rawtna an thlente sorkarin a ngai pawimawh lo nia an hriat avangin nimin khan an nawr leh ta niin a sawi.
Central enkawl university te chuan zirlaite admission fee leh tuition fee te chu an college hmasawnna atan te, zirtirtu indaih lo rawih belhna atan te, college building sakna atan te, property leina atan te an hmang tih sawiin, Mizoram sorkar hnuaia sorkar enkawl college-te pawhin zirlaite admission fee leh tuition fee chu an college tana hman ve tawh an duh thu sawiin, kum tin zirlaiten admission leh tuition fee sorkara an chawi chu Rs. vbc 2.72 a tlin thin thu MSU hruaitute chuan an sawi bawk a ni.