Aizawl: Mizo National Youth Front (MNYF) President L Thangmawia, MLA chuan kum 2023 inthlanpui neih turah MNF party hi Pathianin sorkarna hun a la pe belh ngei dawn tih a sawi.
Ningani khan MNYF hruaitute hi MNF |halai Room-ah Mizo thalai leh zirlaite tan tangkai zawka hma a lak theih dan turte, ram pum huap MNF thalai intawh khawmna Aizawl hmuna buatsaih tum chungchangte leh party tan tangkai zawka a kal chhoh zel dan turte bakah Diamond Jubilee kharna inkhawm neih tur thlir lawkin an thukhawm a ni.
He hun kaihruaitu, MNYF President L.Thangmawia chuan MNF thalaite chu Diamond Jubilee chibai bukin ram tana tha leh zung tam tak an sen tawhnaah lawmthu a hrilh a. “Kum 2023 inthlanpui neih turah Pathian hruainaa kum 60 chuang mipuite tana lo ding tawh MNF Party hi Pathianin sorkarna hun a la pek belh ngei dawn a ni,” a ti.
ZPM party a sawina nia ngaih theih turin L Thangmawia hian, tun laiah firfiak taka politics kalpui, ram tana tangkaina awm miah lo, mi mal nun thlenga rem leh rem loa phuahchawpa rinthu huai taka sawi ching party an awm thar tih sawiin, “Pathian kohhran thianghlim thlenga bawl a, sorkarna lak mai theih inringin ‘Kohhran hi kan unit’ te an ti a; mahse, chung lam hian mal a la sawm lo zel rih a ni,” tiin, mi dang that lohna tuipui bera neiha mahni lam engmah ni bik chuang si lo te hi ram hmelma an ni tih a sawi.
L Thangmawia hian, “MNF Founder President, Mizo Hnampa, Pu Laldenga’n a hlauh em em, ‘Mi hausa game’-ah tute party emaw chu an lut mek a, an headquarters-in bial vil bik neih a phal loh laiin mi hausa, an party tana thawh hlawk takte chuan duhthalin bial an vil mek a. Kum 2023 inthlan candidate puan ni a lo thlen huna buaina nasa tak tawk tur party an awm a ni,” a ti bawk.
MNYF President hian Lengteng biala MLA vawi thum a din veah a khingpuite vawi khat mah a sawisel ve lo tih chu a bial chhung mipuite a hrechiangtu an nih thu a sawi a. Kum 2018 MLA inthlan dawna hel pawl ruaia puhtute pawh thinlung taka a ngaihdam zawk thu sawiin, “Duh huna mi dang fak thiam tak, duh loh huna a chhe thei ang bera sawisel leh thiam nih hi CM nihna tur ni se chuan tu emaw chu vawi tam tak a CM tawh ngei ang,” a ti.
Hripuiin Mizoram chauh ni lo state zawng zawng nghawngin, sorkar laipui pawhin state hrang hrangte lei bat phal zat a tipung hial chungin, finance enkawltu chief minister avang hian sorkar hnathawk hlawh leh mamawh zualah duhthusam phak thei rih lo mah se, harsa trak chungin a kal hram hram zawk a, hun harsa hmachhawn tur hial fel leh tha intite thlang loa mi tlawm tete-te kutah Pathianin mawhphurhna a nghat zawk niin a sawi bawk.