Aizawl: East Tuipui bialtu MLA Ramthanmawia’n a bial chhunga MLA fund hmannate chu eptu party pawhin chhui se an hman thatzia an hre dawn tih a sawi.
Nimina Khawbunga East Tuipui Constituency ‘S’ Block MNF Worker-te intawhkhawmna leh Political training hmanpuitu bialtu MLA Ramthanmawia chuan, “MLA fund hmannate hi eptu unaute hian rawn chhui se, hriat mang loh phuahchawp a siamte hi kan duh ve lo a, MLA fund hmanna min chhuisaka min tlangzarhsak hunah kan hman thatzia an hria ang,” a ti.
Ramthanmawia hian a bialten thil dik lo ti tura nawr an awm lo chu lawmawm a tih thu a sawi a, “He ram hi dikna hmang a kan hruai loh chuan chung lam pawhin min la kal san dawn a. MNF MLA ka mualpho a, ka duham a, eiruknaah ka fihlim lo anih chuan kan ministry pawh mualpho takin keimah vangin a awm thei,” tiin, rinawmna leh dikna vuan chung a, mahni retheih huama ram leh mipui enkawl a nih chuan Pathianin a chawisang zel dawn tih a sawi.
MNF Adviser Ramthanmawia hian nakkum MLA inthlan lo awm turah an khingpuite mi mal thil, chhungkaw lam hawi leh mawi lo zawnga tumah bei lo turin kalkhawmte chahin, “Pathian kan lama tang tur chuan kan thinlung dik se la, mi dangte sual zawk leh tha lo zawka ngaih emaw, mahni tling ber anga kan inngaih chhung chuan Pathian malsawmna hi kan tawngbaw ngai dawn lo a ni,” a ti a. MNF party ni lo pawh mangang leh pachhia, hmeithaiten harsatna an neite tan pawh a ding zel dawn niin a sawi.