La Liga hmahruaitu in a mawngphah a awm lakah hnehna an chang a. Real Madrid in goal thum khungin Elche 3-0 in an hneh.
Nilaini zana La Liga inkhelah Estadio Martínez Valero-ah Real Madrid hian goal thum dang VAR hmanga endik hnua pawm loh an nei.
El Clasico a an hmelma Barcelona thunun hlim Real Madrid hi an chungnung leh hle a. Tun season a chak la nei lo Elche lakah hian Federico Valverde, Karim Benzema leh Marco Asensio ten goal an khung.
Goal thum an khung leh goal pawm lohte bakah hian Real in goal hlauhawm an insiam hnem malh malh hle. Thawhtanni zana Ballon d’Or dawngtu Karim Benzema in minute 6-na a goal a khung chu Vinicius Junior offside avangin pawm a ni lova. Midfielder Valverde-a’n tun season a a goal rukna a khung hnuah David Alaba leh Benzema te bawkin goal pawm loh an khung.
Real Madrid coach Carlo Ancelotti chuan, “He inkhel hi huphurhna pakhat ka nei a, a chhan chu Clasico zawhah hian han tlakhniam deuh hi a awm ve thei. Player te thlak kual ka rilruk a, mahse chhuanlam siamtu a ni ve thei. Kan player-te an kheltha a, mahse minute 70 vel chhung kha chu inkhel inhawng tak a ni.” tiin a sawi.