MPL table mawng a awm club pahnihten invawrhna huntha an nei a, mahse hmang tangkai thei zawk awm lovin inkhel hmuhnawmah 3-3 in FC Bethlehem leh Electric Veng FC te an inhnehtawk.
Nilaini a Rajiv Gandhi Stadium a inkhelah team pahnih inkhel a hmuhnawm a, an inthlau lo. Halftime dawnah F Lalchhanchhuaha hmangin Electric Veng in goal an khung hmasa.
Mahse Bethlehem in second half-ah an chhanglet ring a, JH Remlala hmanga an si phurh an sut hnuah Lalbiakdika leh Lalrintluanga ten goal an khung belh.
Nimahsela Electric Veng in tlawm an tum lo. Kheltha tak Rampianmawia chuan minute 81-na a goal a khung hnuah minute 85-naah Jonathan Lalrawngbawla’n an si phurh a sut.
FC Bethlehem hian karleh Nilaini chhun dar 12-ah Chhinga Veng FC an khel leh anga. Chawhnu ah Electric Veng FC leh Chawnpui FC te an intum ve bawk ang.