Liz Truss-i chuan a bân tur a tichiang tawh a, UK prime minister thlang leh turin rorel lai, Conservative Party chuan an hruaitu tur thlan an hmabak leh ta.
Party hruaitu tur, prime minister ni zui nghal tur thlan hi October 28-ah zawh fel hman a ni ang.
Candidate nih tumte chuan Tory MP 100 talin an thlawpna hmuh a ngai a, MP 357 chauh an neih avangin chuh thei hi mi pathum bak an awm theih lo tihna a ni.
An kal dan tlangpuiah chuan chuhtu pahnih emaw, pakhat emaw an awm thin a. Pakhat chauh a nih chuan party member-ten vote an thlak kher ngai lovin tihfel mai a thei tihna a ni.
Tun thleng chuan tumah chuh dawn tia sawi chiang an la awm lo va; mahse, candidate ni thei erawh an awm thung.
Hming langsar ber chu Rishi Sunak-a a ni a, Boris Johnson-a thlaktu tur pawh khan a chuh tawh a; mahse, Truss-i a hneh ta lo.
Kum 2015 atang chauhva MP niin Richmond-a North Yorkshire bial vawngtu a ni a. Westminster pawn lamah chuan hriat hlawh ngai vak lo mah se February, 2020 khan chancellor a ni a, hripui len lai khan a hma lakna avangin a lar zui hle.
Hmeichhia tho, Penny Mordaunt-i pawh a langsar hle a. Ani hi kar tirah khan prime minister nih a tum thu a lo sawi thawi tawh.
Parliament inkhawma inringtawk taka a khawsakna thinin lawm a hlawh a, mi ngainat pawh a hlawh.
Truss-i a tlin tum pawh khan a chuh a; mahse, thlawptu MP pawh ngah hle mah se a tawp a thleng zo ta lo.
Truss-i lamtang nghet tak a nih angin House of Commons-ah leader atana ruat niin Privy Council-ah Lord President atan a ruat bawk a. Lal thar puala Accession Council paw kha a kaihruai a ni.
Kum 2019 khan Mordaunt-i hi UK-a hmeichhe zinga defence secretary ni thei hmasa ber a ni a, amah hi naval reservist niin David Cameron-a hnuaiah khan armed forces minister a lo ni tawh bawk.
Mordaunt-i hi MP zingah John Lamont, Maria Miller, Bob Seely leh Damian Collins te chuan prime minister atana an duh thu an sawi tawh.
Heng mite pahnih bakah hian Truss-i’n a thlak tak, Boris Johnson pawh chuh leh tura rinkai zingah a la tel a. Ani bakah hian hmeichhe pahnih, Kemi Badenoch leh Suella Braverman te pawh sawi rik an ni a. Ben Wallace-a pawh sawi rik ni hman mah se amahin a tum loh thu a sawi chiang tawh thung.