Kum 3 a lo liam ve leh ta reng mai
(Zaithiam C. Lalrinmawia pual)

  • Ramhluna Hnamte

C.Lalrinmawia nen hian kan inkawm tam ve lem lo. Kei Shillongah lehkha zir a ka awm lai khan AIR Aizawl atanga artistes rawn lar chho zinga hriat hlawh berte zing a mi a rawn ni chho a. Keini AIR Shillong a a hminga radio artiste ni a lo zai ve thin ta chu kan in ralkhat hriat a. Aizawl ka chuan chhuah hmasak ber tumin Amah C.Lalrinmawia leh a thian te F.Lalnunfima(L) leh Zira Hnamte(L) te zingah ka tel ve zauh zauh a. An zinga awm a nuam in an fiamthu a sang thei hle. Anni ho kha ‘All Mizoram Concert’ in vuah in Zir Sangzela Hnamte, Zira Hnamte, F.Lalnunfima, Liandailova Chhangte leh C.Lalrinmawia te nen zai in Mizoram hmun hrang hrang an fang thin a, mipuiin an hlut em em thin a ni. Tunah chuan an memberte hian chatuan ram an pan vek tawh a nih hi, a va lunglenthlak ta em !! Vawikhat chu Leitlangpuia sorkar hna ka thawh tawh hnu in Aizawl ka zin a, chumi tum chuan an ni ho hian Hlimenah concert an lo nei a, guest artiste angin ka zai ve nghe nghe a ni. Chu chu C.Lalrinmawia te nen a kan inkawm leh zaino chu a ni mai. Tunhnu deuh, 2004 khan cassette a siam thar a, chu chu copy 100 zet ka tih ral turin min rawn thawn a, ka hralh zawh sak vek a, Aizawl a ka hna ka zawm tawh hnu in ka office ah ka hralhna man a rawn lam chu a lawm ve hle in ka hria. Khaw hmuna awm lo, chet lei in ang lo, hnathawh in ang bawk lo chu kan in hmu khat hle a, mahse kan tui zawng a in an avangin kan in ngaina hle.

Amah ka hmuh hma daih in AIR Aizawl atangin ‘Virthlileng group’ zai ka lo ngaithla tawh a. Chu group ah chuan a hming an puang lo na a, vocalist kha thiam ka tih em avangin he group vocalist hi tunge ni ti a ka ngaihven hnuah tun hnu a ka ngainat tak la la ni tur C.Lalrinmawia a ni tih ka lo hre ta a ni.

A damlo tih ka hria a, a tha leh deuh tih te pawh ka hre ve zel a. A that leh mai ka beisei laiin a dinhmun a tha lo hle tih ka hre ta a. Ti chuan October ni 15, 2019, kan thian pa Zir Sangzela Hnamte death anniversary 17-na a nih avangin Zir Hnamte te inah ka chho va. Kan hmanlai hun te kan sawi a. Chutih lai chuan kan thian C.Lalrinmawia chu a na zual viau a ni tih kan hria a. A hma daih in Zira nen hian Mawia kan hi kan lo rawt tawh thin a. Amaherawhchu Zira hian 2014 atang khan lung natna a neih tak avang khan kan thil tum chu kan ti puitling hlei thei lova. Hemi tum hian a lo dam tha deuh bawk a, Chaltlang lamah chuan chawhnu lamah kan in khalh chho ta a ni.

Mawia chu a lo chau in a lo biak theih tawh meuh loh a, a rilru erawh chu a harh a, a kut min pe a, kan chibai a, tawngtaina kan hmang a, chu zawng chu kan tih theih tawk a ni ta.

Hetia kan tlawh hnu ni 3 na, October ni 18,2019 chuan chatuan ram min lo pan san ta a ni. Kan va ui in kan va ngai vawng vawng em!

Mawia boral atanga kum 1 leh ni 23-na chiah an kan thian Zira Hnamte pawhin heart attack avangin November ni 10,2020, Covid 19 pandemic nasat lai tak khan rih sang mual a lo liam ve leh ta a ni. Vawiin C.Lalrinmawia thih champhaphak vawi 3-na, Anniversary zawng a sawi chuan 4th Anniversary ah hian C.Lalrinmawia leh All Mizoram Concert member mual liam ta zawng zawng te an ngaihawm thar mang e. An sawi Pialral ram nuamah chuan hlim taka an in tawn hlawm kan beisei.

Vawiin Oct ni 18,2022 C.Lalrinmawia thih champhaphak an hian amah kan zingah awm tawh lo mahse a zai hla mawi leh a aw mawi tak chu Zofate thinlungah a cham reng fo tawh ang. Adios, C.Lalrinmawia.

Leave a Reply

error: Content is protected !!