Album thar nen Spotify record thar siam, hla hit neih ring lo!

Taylor Swift album thar tlangzarh hlimhlawl, ‘Midnights’ chuan nikhat chhunga Spotify-a album stream hnem ber record a chelh rualin, hla hit a vawrhchhuah rinna erawh a chau hle thung.

Midnights hi Taylor-i studio album 10-na chiah niin, Guardian leh Independent chanchinbu lian pahnih chuan five stars an pe a, ‘Cool tak, hla puitling leh lawrkhawm tha tak, hla ngaihthlak nuam tak tak vawmkhawmna’ an ti.

Hetih lai hian, critics lam ngaihdan erawh a inkalh angreng a, a tam zawkin an fakrawn laiin, hla hit thurchhuah tur pakhatmah a awm lo, ti te pawh an tam. Evening Standard chanchinbu chuan ‘Hla hit thurchhuah tur erawh kan hmu mai lo’ tiin an ngaihdan an ziak.

Pop star album 10 (sawmna)-na hi October 21 zan khan tlangzarh niin, Spotify user te lawmah a tlachiang hle a, record thar hlak ropui bawk si an siam.

Engnge lo thleng ta le?

Spotify an hmangchhe thak mai lo’ng maw tih hlauhthawnawm khawpin album thar hi user te’n an ngaihthlak rawn nasa hle.

Swift pawh a lawm, fan te’n a beisei leh ngaihtuah phak bak piah lamah an lo ngaihhlutsak chungchangah a lawmthiam hle.

“Heti taka vanneihna hi engtinnge ka tawnbuak theih zawk le, rinphak leh beisei phak piah lama ka tana in thil tihnaah ka lawm takzet. Engnge lo thleng ta le, tiin ka inzawt fo mai,” tiin a sawi.

Mainstream lamah letleh

Music mogul Scooter Braun nena an intihthiam loh hnu-a kal hrang ta Swift hian tunlai hian a hla hmasa ta record that leh hna a kalpui mek a, tun tumah erawh hla thar hlak vawrhchhuah a duh vangin re-recording a neih mek a chawl lailawk.

Midnights hi kum hnih liamta chhunga kum 32 mi Swift-i’n original album hmasa ber a tihchhuah niin, mainstream lama a kirlehnaa ngaih theih a ni a, album hmasaa acoustic tone leh mute awm zauh zauh ang kha tun tumah chuan ngaihthlak tur a tlem hle a ni.

Leave a Reply

error: Content is protected !!