Bawng natna chi khat, Foot-and-mouth disease (FMD) chu tunlai hian Champhai district-a East Tuipui bial khaw hrang hrangah a leng mek nia hriat a ni.
Ran ka leh ke natna leng nia rinhlelh chungchang hre fiah tur hian Vety department-a mi thiamten Ningani kalta atang khan khaw hrang hrang tlawh kualin a hmun ngeiah thil awm dan an enfiah tawh.
Vety department hotuten an sawi danin Saikhumphai, Vaphai leh Farkawn khuaa bawng, khawchhak lam atanga lo lutte endik an ni a, tual chhunga an vulh bawng thenkhat chuan ran ka leh ke natna hi an lo kai ngei tawh nia hriat a ni.
Khawchhak atanga ran lo lutte atangin tual chhung bawngte hian heng natna hi an kai ngei niin an awm dan phung atanga hriat a nih thu an sawi a. Ran thenkhat chu a neituten an thiam dan ang anga lo enkawlin dam lehte pawh an awm a, ran damlo atanga sample an lakte chu Aizawla endik turin an thawn.
Hetihlai hian Myanmar atanga bawng lakluhte hian Mizoram hmun hrang hrang an thlen thin avang leh ran natna hi an kai darh thei tih hriain Champhai district magistrate chuan Myanmar atanga bawng lakluh khapna thupek tun hnai khan a tichhuak.
Champhai district chhungah Myanmar atanga bawng lakluh phal a nih loh bakah Champhai district chhungah bawng phurh sawn/khawih chet rih loh tur a ni a, hri kai lo nia hriatte pawh hmundanga phurhsawn khap a ni bawk.