Aizawl : Home Minister Lalchamliana’n COVID19 avangin Mizoram Police recruitment tih theih a nih rih loh tur thu a sawi a. Police lak theih rih loh tur chu hrehawm a tih thu a sawi.
Tun thla ni 17 – 21 chhunga neih Mizoram Police sports meet kharna, RG Stadium, Mualpuia neih a hmanpuinaah he thu hi Zirtawpni kalta khan Home Minister chuan a sawi a. Mizoram police, sports lam thei zual bik te chu sora rin a remchan dan ang zela duhsakna reward te promotion te a lo pek tawh thin thu a sawi.
Home Minister chuan Mizoram police te inpekna leh thawhho that avangin mipui rin an hlawh em em nia sawiin, kawng engkimah Mizote tan kaihruaitu leh entawntlak ni tura mahni inthunun leh taimakna ngaipawimawh zel turin a chah a. Mizoram Police te chu infiamna piahlamah midangte tana malsawmna nih tum zel turin a fuih.
Sports meet chuan an rilruah a aia sang zel duhna pe se a duh thu Home Minister chuan sawiin, Mizoram maia duh tawk lova, national leh international level thlenga lawmman la tura tan la turin a fuih a. Mizoram Police zawng zawng te duhdakna a hlan bawk.