Bundesliga champion lai Bayern Munich in league hmahruaitu ni lai Union Berlin chu ngawrh zawkin an um tak tak tan a, point khat chauh a an inkar ti tlemin Hoffenheim an hneh.
Inrinni zana PreZero Arena a inkhelah Bayern Munich hian first half-ah goal hnih khungin 2-0 in an chak a. Hoffenheim lakah hian harsatna lian tawk lem lovin point thum an hmu.
Bayern tan forward Jamal Musiala chuan goal hmahruai a khung a, striker Eric Maxim Choupo-Moting chuan an goal hnuhnung zawk a khung.
Hoffenheim goalkeeper Oliver Baumann chuan Bayern goal khung belh tur a dansak nual bawk.
Inkhel dangah Borussia Dortmund in 5-0 in VFB Stuttgart an hneh a. Table-ah panganaah an chho.
Dortmund tan midfielder Jude Bellingham chuan goal hnih a khung a, Niklas Sule, Giovanni Reyna leh Youssoufa Moukoko ten an khung ve bawk.