Rishi Sunak-a chu Boris Johnson-a’n inthlan a chuh dawn loh thu a puan leh tak hnuah UK prime minister a nih mai hmel ta hle.
Liz Truss-i a bân hnua rorel lai, Conservative Party hruaitu tur, prime minister ni nghal bawk tur thlan turah hian chuh ve tum dang, Penny Mordaunt-i chuan inthlan chuh tura an party MP zinga thlawptu a neih ngai zat a la hlat hle a, a chuh thei dawn em a la chiang lo.
Sunak-a erawh chuan an party chhung inthlan turah hian chuh turin an MP 100 tal thlawpna a mamawhah 142 laiin an thlawp tawh a. Tory MP hian Johnson-a a bâna Truss-i thlan a nih tum pawh khan inthlan hi a lo chuh tawh a, a tling zo lo ta thung a, Pathianni khan inthlan awm leh tur hi a chuh dawn tih a sawi chiang ta a ni.
“Kan economy siam that, kan party tihpumkhat leh kan ram tana thil tha tih ka duh,” tiin Indian chhul chhuak, chancellor hlui hian inthlan a chuh tur thu a puanna thu tawi te a sawiah a tar lang.
Hetih lai hian Truss-i’n a thlak, prime minister hlui, Johnson chuan Caribbean-a a chawlh hman pawh pawt tawia haw rum ruma inthlan chuh tuma inbuatsaih mek a nih laiin Pathianni tlai khan an party inthlan chu a chuh dawn loh thu a sawi leh thut a. An party chu ‘parliament-ah lungrual takin a hruai thei dawn lo’ niin a insawi.
Kum 58 mi, Johnson-a hi ‘Downing Street-a let leh’ a tum ngei tiin a lamtangte pawhin lo sawi tawh mah se Sunak-a emaw, Mordaunt-i emaw angin an party lungrualin a kaihruai thei dawn lo niin a insawi a ni.
“Duhsak taka chuh tura min nawrtu pawh an awm a; mahse, mawlmang taka ngaihtuahin tun hi chu a hun lo a ni ang tih ka hlau a ni,” tiin Pathianni tlai tawh takah khan a sawi.
Johnson-a’n inthlan a chuh dawn loh thu a puan hnu lawkah hian Sunak-a chuan a boss hlui chu ramin chona lian tak tak – Brexit, Covid vaccine pek chhuah leh Ukraine indo laia a hruainaah a fak.
“Prime minister nih a tum nawn leh ta rih lo va, a in leh ram dang atang pawhin vantlang tana a inhman zel ka beisei,” a ti bawk.
Sunak-a’n thlawptu a neih that tawh mek laiin a khingtu tura sawi awm chhun ni tawh, Mordaunt-i chuan thlawptu a la nei ngah zo rih lo va. MP 29 chauh a la nei.
Mordaunt-i hian an ram huna Thawhtanni chawhnu dar 2:00 (India-a zan dar 7:30)-ah inthlan chuh tura MP thlawptu neih ngai zat a nei hman lo a nih chuan Sunak-a hi tlinga puan a ni ang a, prime minister pawh a ni zui nghal ang.
India-ah chuan Sunak-a hi a nupui, Akshata Murty-i avanga hriat hlawh a ni zawk a, Infosys dintu pakhat zawk, billionaire Narayana Murthy-a makpa a ni.