India-a khawlai leh chenna inte chu laltin leh khawnvar rawng lar tak taka cheiin mi maktaduai telin Hindu kûtpui, Diwali an lawm.
Kût lawmna hi boruak bawlhhlawh nasa thin avangin sawi a hlawh a, a bikin ram khawpui ber, Delhi-ah a ni zual.
Ruai theh, tawngtai leh halpuah leh halmawi hal hun, Diwali hi India ramah chuan lawmtu tam ber kût a ni a. ‘Eng kût’ tia sawi niin êngin thimna a hneh leh thatnain sual a hneh lantir nen khawnvar leh bati an chhi thin.
Mite chuan an in chu khawnvarin nasa takin an tiêng a, powder rawng lar tak hmangin, vanneihna lo thleng tur lawm nan leh an nuna thil tha a awm theih nan rangoli an ziak chei chuai thin bawk.
Chhungkua inhmukhawmin an tawngtai a, halmawi an hal a, kût ruai an theh a. An thiante leh chhungte tlawh kualin chithlum, thilpek leh duhsakna an inhlan tawn thin.
Diwali ni hi thla awmna hmun azirin kum tin a inthlak thin a, October leh November-ah a ni ziah thung a. Kuminah hian Thawhtanni kha a ni.
Kum hnih liam ta chhung khan Covid-19 avangin kût hi khuahkhirhna hnuaia hman niin punkhawm pawh a theih loh va. Kuminah erawh khuahkhirhna hlih vek a ni tawh a, mipuiin an duh ang thâlin hun an hmang leh thei ta a ni.
Nasa taka kût lawmna hian boruak bawlhhlawh nasa taka a siam thin leh chutiang a nih loh nana khuahkhirhna awm chuan sawi a hlawh hle.
State thenkhatah chuan sorkarin halpuah leh halmawi hal chu a khap a, khap vek lote pawhin hal hun an siam a. Mi tam takin an hal tho va hei hian boruak a tibawlhhlawh nasa thin hle.
Khawvela khawpui boruak bawlhhlawh ber, Delhi-ah chuan Diwali-a halmawi hal hian a tibawlhhlawh zual hle thin a, thlasik laia an thenawm state, Punjab leh Haryana-a lo neituten an thlai sengna ro an halin a tihbawlhhlawh thin chu a belhchhah nasa thin.
Kum dang ang bawkin Delhi sorkar chuan hal a khap leh a. A hal lui chu thlaruk lung in tan leh Rs. 200 chawia hrem turin a ti.