Aizawl: Mizo National Youth Front Aizawl South I chuan nimin khan Liando Resort, Sakawrtuichhunah political training an buatsaih a, hun hmanpuitu MNF Adviser, Dr R Lalthangliana, Minister chuan MNF sorkar chu hun pangngaiah a ding lo tih mipuiin an hriatpui an duh tih a sawi.
Dr R Lalthangliana chuan an sorkar tan tirh kum khat hnuah Covid-19 a leng a, hemi avang hian engmah an ti thei lo a, sorkar hna an la thei lo a, contract/supply hna a inpek theih loh tih a sawi a, “Hun pangngaiah kan ding lo a ni tih hi mipui hian min hriatpui ka duh a, eng emaw chen chu Covid khan min la nghawng dawn,” a ti a, tunah hian dan pangngaiin an kal tan ve dawn chauh a, theihtawp chhuah an tum tih a sawi.
MNF adviser chuan an sorkar kum li a kal chhung hian inthlan hrang hrang vawi 10 chuang an hmachhawn tawh a, tui let hnuah vawikhat mah an la sorkar ngai lohnaah majority-te lain an sorkar zel tih a sawi a, an inpumkhatna a that zel a tul thu a sawi bakah an theihna zawn theuhah insangmar zel turin MNF nuho chu a chah a. Nakkum inthlanah Pathianin hun tha a pe ang a, an sorkar leh ngei dawn tih a sawi.