Health Minister Dr R Lalthangliana’n sorkarin ZMC, Falkawn thuamthat leh tihchangtlun hna a thawh zel thu sawiin, nurse 60 vel lak tum a nih thu a sawi.
ZMC week kharna kar kalta Zirtawpnia Vaivakawn cultural centre-cum-auditorium-a neih a hmanpuinaah he thu hi Health Minister chuan a sawi a. ZMC damdawi in-a khum 150 awm thinah khum 400 chuang dah a ni tawh thu leh khum 100 awmna, damlo enkawlna tur dang pawh sak zawh hnaih a nih tawh thu sawiin, heng te avang hian nurse pawh lak belh tum a nih thu a sawi.
Health Minister chuan ZMC, Falkawnah zirlai 80 ve ve awm theihna tur mipa mostel leh hmeichhe hostel sak mek a nih thu sawiin, Interns’ hostel room 60 a awm thei dawn bawk niin a sawi a. Academic building peihfel thawh- khat a tawh chu Union Health Minister hawn tir tum a nih thu a sawi.
ZMC campus chhungah futsal ground, basketball court, gym leh SU office tur te pawh ruahman tum a nih thu Health Minister chuan a sawi a. ZMC zirlaite chu an zirna piahlamah insawizai leh hriselna thate ngaipawimawh turin a chah bawk.
Health Minister chuan nakuma ZMC atanga MBBS first batch (2018) chhuak tur ten National nedical inspection tha taka an paltlang chuan ZMC hmingthatna leh zahawmna thui takin a keng tel dawn tih a sawi a, Mizo doctor-te zingah MBBS chu tam tawh mahse, mithiam bik super specialist an la tlem thu a sawi a. ZMC-a MBBS zirlaite chu MBBS ah duh tawk mai lova, thiamna sang lehzual um turin a chah.
Mizo zingah cancer super specialist pakhat chauh an la awm thu leh tunhnaiah Super specialist 2 – Cardiology (lung) leh Nephrology (kal) ah an awm leh ta chu lawmawm a tih thu Health Minister chuan a sawi bawk.
Health Minister chuan JICA, Japan nena thawk hova Aizawl-a Cancer Super Specialist Hospital din tura chak taka hna kalpui mek a nih thu a sawi a. Rs. vaibelchhe 700 senga sak tur Cancer enkawlna tur damdawi inpui chu 2028 kumtawp lamah peih hman beisei a nih thu sawiin, India hmarchhakah cancer hospital tha ber a nih theihna tura theihtawp chhuah mek a nih thu a sawi bawk a ni.