Aizawl Municipal Corporation Board of Councillors nimina thukhawmin councillor tih chu corporator tia thlak turin thutlukna a siam a, Bawngkawn – Chanmari (via Ramhlun) kawng ‘Laldenga Road’ tia thlak rawtna pawh pawm mah se, eptu lam chuan tul ti lovin rorelna hmun an chhuahsan thung.
Board of Councillors thukhawm hi Mayor Lalrinenga Sailo-in a kaihruaiin, Aizawl khawpui hmasawnna atana tul leh mamawh hrang hrang an sawiho a. Rorel lai Councillor Lalfakzuala Chenkual-in ward atanga thlan chhuah councillor tih hming pu, corporator tia thlak a rawtna chu BOC hian a pawmpui a ni.
Bawngkawn – Chanmari (via Ramhlun) kawng chu Laldenga, Mizoram state puitling a nih hnua chief minister hmasa ber hming chawia ‘Laldenga Road’ tia thlak rawtna chu BoC thukhawm chuan a pawm bawk a, hetihlai hian helai kawng hi AMC thovin Nehru Road tia a lo pawm tawh a nih avanga thlak leh tul ti lovin eptu councillor-te chuan rorelna hmun an chhuahsan a. AMC sorkar kal tawha BoC, tuna mayor pawh a tel vena ngeiin Nehru Road tia an pawm tawh thlak leh chu tul an tih loh thu an sawi.
Chaltlang Diet peng, Chaltlang Bethel kawng hnuai peng atanga PWD road, DIET leh F. Malsawma in inkar atanga Laikunga (L) kawt thleng ‘Laikunga Road’ tia vuah rawtna pawh BoC thukhawm chuan a pawm bawk a ni.
BoC thukhawm chuan Aizawl khawpui hmasawnna tur ngaihtuahin leh kum tam tak hnua development awm tur thlirin AMC area chu zauh zel a tul nia an hriat thu an sawi a. AMC area zauh a nih theihna tura a tul anga hmalak an rel.
Kum 2015 khan Aizawl Municipal Council chu Aizawl khawpuia cheng nuai thum chuang an nih tak avangin corporation-ah hlan kai a lo ni tawh a; corporation-a hlan kai a nih tak avangin AMC chu Aizawl Municipal Corporation tih a ni zui a, AMC chairman tih thin pawh mayor tia thlak a ni a, vice chairman pawh deputy mayor tia thlakin, chief executive officer chu municipal commissioner tia thlak a ni bawk.