Champhai bula Keilungliah khuah mek – Dam reservoir and development of recreation centre at Keilungliah- M/S S.S Construction-in Non lapsable central pool of resources, NLCPR (DoNER) sum Rs. nuai 1,988 hmanga an thawh mek chu zaa 98 vel zo tawh anga chhut a ni.
Keilungliah khuah mek hi nimin khan Chief Minister Zoramthanga’n tlawhin, hnathawktute chu an hmalaknate leh hma- lak zel dan tur te a sawipui a ni.
Sorkar thuchhuahin a tarlan danin, he project hian concrete gravity dam leh a panna kawng siamnate a keng tel a. Keilungliah tuikhuah chim chin zau zawng sq.m 84130.19 niin, tui litre 40,22,51,500 tling thei tura ruahman a ni a, a chim chin thui zawng metre 930 thleng ni tura ruahman a ni bawk.
Lui khuahna san zawng metre 20 niin, a khuahna bulthut chhah zawng metre 14, a chhipah metre 4 a chhah a ni a. A khuahna bulthut thui zawng metre 54.61, a chung lamah metre 102.60 a ni. A sir tawn tawnah kea kalna metre 1.50 a zau siam niin, a pawhtu luiah te hnawm lut tur danna siam tur leh irrigation pipe vuah tura ruahman a ni.
Kum 2018-a tan Keilungliah khuah hna hi March, 2020 a zawh tura tih ni mahse, hun tiam chhunga zawh hm- an a ni lova, kum hnih atan pawhsei leh a ni, kum hnih pawhsei leh chhung hian tuikhuah leh a project in ken tel dang te chu zawh fel hman beisei a nih thu sorkar thuchhuah chuan a tarlang a. He tuikhuah hi Champhai khawpui tui mamawh leh thal laia kuthnathawktute tui mamawh phuhruk nan te, lenkhawthawn na leh khualhip nan te, Sanghate khawia eizawnna tihhmasawnna nan te, khawpui timawitu leh sik leh sa tinuamtu atantea ruahman a ni a nih thu a tarlang bawk.