- Reuben Lalnunthara Hnamte
He kan thupuia kan tarlan tawngkam hi Aigupta lal Pharoa tawngkam a ni a. Jodefa chung changa Pharoa tawngkam a ni tih hre lo chu kan tlem viau maithei. Tun tum chu Josefa nun atanga kan zirtur lam hi lo hawi thung ila. Anunah hian zir tham pawimawh em em a tam mai a, kan sawi seng kher lova. A pawimawh zual te lo tarlan han tum dawn teh ang..
A tuarchhelna : Josefa tuarchhelna hi entawn tlak a ni a, a pa fapa duat em em, kehthei dawm a dawm kha a ute insikna avangin Aigupa salah hralh an ni ta mai a. Hei hi Human trafficking kan hmuh hmasak ber pawh a ni maithei. Hetih laia Jodefa chan hi a rapthlak in, tuar thiam pawh a har viau ang. A unau a rin em em ten an han hralh mai duh kha. Lungngaia tapa indawmkun mai a tum lo; Stress, anxiety leh depression neih nan a hmang hek lo. Chhel tak leh lungawi takin a tuar mai a ni.
A rinawmna : Aigupta sipai hotu hnenah salah hralhin an awm ta a. A rinawmna a thlah lova, tlawm tak siin, a rinawm em em a, a pu pawhin hnathawk ho chungah a kaisantir hman hial a ni. A pu nupuiin a lo hmu tai ta tlat mai a. Tlangval chak vanglai, hmeltha bawk si chu, a pu nupui; sipai hotu nupui chhe lo tak, Aigupta nula hmeltha a thlanchhuah ngat pawh a ni maithei. Kha tih laia Josefa tan thlemna hautak tur zia kha chu… mahse, a rinawm tlat, a pu lakah mai a ni lo; Pathian lakah a rinawm a ni. Chutah a pi beidawng chuan a nilo zawngin dawtin an puh ta daih lehnhal a. Josefa chan ang kha tunlai thalaite hian chang ta se, mahni an intihlum duh mai ta ve ang.
Jail-ah dah a ni : Hmingchhiatna tinreng nen, sal ni bawk si chu Jailah dah an ni ta a. Jail tang ho chuan an hmusitin an tiduhdah viau ngei ang. Mahse, Josefa chuan a rinawmna leh a dikna a thlah chuang lo, Jailah pawh tannin hotu duhsak a hlawh leh hman a ni. Chutah theihngilhin an awmzui a, a tuar kha chu namailo tak a ni. Mahse a rinawmna te, a tuarchhelna te, Pathian a rinna a thlah chuang lo.
Chawisan a ni ta : A tuarchhelna te, a rinawmna te, Pathian a rin tlatna chuan rah tha a chhuah ta a. Aigupta ram lalber Pharoa beng alo thleng ta a. Aigupta rama tam nasa taka a tlak tur thu te an sawi chuan Pharoa ngeng a chhun ta tlat mai, he ta Pharoa tawngkam hi ava ropui em ,’ Hetiang ang Pathian Thlarau awmna mi hi kan hmu zo dawn em ni’ (Genesis 41:37) tiin Josefa chu a chawisang ta a ni. Dawta sual tinreng a puh, Jail runthim bel mek, sal ni bawk si kha vawi leh khatah Aigupa Prime Minister an ni ta thut mai kha, khawvel Historyah pawh hian hmuh tur a vang hle ang.
Kan ram intodelh lo zia chu kan hre theuh a, kan tlangaupui chamchi bawk a. Josefa anga tawn hriat ngah( Experience nei) , Pathian tih mi hi ram hruaituah pawh kan mamawh chu a ni. Ram changkang zawkte hian tawn hriat ngah( experience) hi an lo dah pawimawh khawp mai. Kan ram la that zia te, tui leh sik leh sa nei tha, leilung tha bawk si , mihring kan la tam bawk silo nen, ram hmangaihna tak leh ngaihtuahna seng peih ila chuan intodelh mai nilovin, state dang tan pawha zarzo tham hi kan nei ngei ang. Aigupa ram, khati khawpa tamna nasa kha Josefa rorel thiamna leh Pathian a tih tlatna khan, tam hrehawm tuar miah lo leh, an chhevela hnamdangte tan pawh a zarzo thamin Aigupata a siam thei a ni.
Mizoram mi tlemte, 2022 population a 1,205,974 (Nuaih 12 chuang hret chauh) awmnaah hian intodelh hi kan harsat a rinawm lem loh. He ti khawp hian State dangte lakah kan la tlem a ni a. Nakum lawkah inthlan kan hmachhawn leh dawn a; sum leh pai leh tawngkam thiamna hmachhuan ngawt ni lo; ram hruaitu tha, HETIANG ANG PATHIAN THLARAU AWMNA MI HI AN AWM DAWN EM NI? tih turte te ngei kha kan ram hruaituah hian kan thlanchhuah a pawimawh khawp mai.
Tunah te hi chuan Silchar kawng a tlang loh hleka buai mai kan la ni a, kan dinhmun hi a la tha lo hle. Therhlo leh mahni hlawkna tur hlir mai emaw tih tur hian kan phe suau suau mai a, mipuite pawh hian kan zir a pawimawh. America President fam ta John F. Kennedy a tawngkam han hawh lawk ila “ Ka ram hian enge min tihsak theih ang tih aia, ka ram tan hian enge ka tih ve theih ang? tih hi Zoram mipuite inngahna ni tawh se ava duhawm em! A dik tak chuan a thawha thawhchhuah lam ai hian thawk lova hlawh tam tak neih theih dan hi kan rilruah a lian ta em ni ang, tih theih a ni. Josefa kha a hnamah a chiang a, a Pathian Jehova a zahpui hek lo. Ringlo mi Pharoa meuh pawh hmin thei tu Josefa nun hi a entawntlak takzet a ni.