India khawpui, Delhi chu boruak chhia leh hlauhawm kai chinin a tuam leh mek a, politician-te chu mawhphurtu zawkah an inpuh tawn mek.
Delhi-a rorel lai, Aam Aadmi Party (AAP) chuan sorkar laipui chuan boruak bawlhhlawh lutuk venna tura rawtna awmte chu a hnawl niin an puh.
Hetih lai hian union environment minister, BJP hruaitu chuan AAP-in ‘Delhi chu gas chamber-ah a chantir’ niin a sawi ve thung.
Delhi hi kumtluanin khawvela khawpui zinga boruak a bawlhhlawhna ber pakhat a ni.
Heti taka boruak a bawlhhlawh thin chhan hi vaivut, khaw awm dan, lirthei khu leh industry khu chhuak te vang a ni.
Thlasikah hian an thenawm state-a lo neituten an thlei sengna ro an hal nasat thin avangin a khu a lut a, chu chuan nasa takin a tibawlhhlawhin mihring tan a tihim lo zual bawk.
Ningani tukah khan khawpui chhung hmun tam zawk chu boruak chhe takin a tuam hlawm a. Sorkar hnuaia a viltuin boruaka bawlhhlawh awm, PM2.5 zat a tehnaah chuan hmun tam takah 500 a kai.
Air quality index (AQI)-ah chuan bial (zero) leh 50 inkar hi ‘tha’ a ni a, 51 leh 100 inkar chu ‘la awm theihna’ a ni a. 500 chung lam chu ‘hlauhawm tak’ tih a ni.
Boruak a bawlhhlawh thar leh mek lai hian Nilaini khan Delhi sorkar chuan mipuite chu a tam thei ang ber in atanga hna thawk tura ngenin lirthei khu tichhuak tlem zawnga khawsa turin a ngen a. In sak kal lai mekte chu a chawlhtir lailawk bawk.
National Commission for Protection of Child Rights chuan sorkar hnenah hian boruak a ziaawm hma chu sikul khar turin an thlen bawk.
Khawpui berah hian Diwali lawm hnuah boruak a bawlhhlawh nasa zual thin a, hei hi kum tin a lawm nana halpuah leh halmawi hal nasat thin vang a ni a. Kuminah erawh khaw awm danin a zir deuh avangin kum dang ang em emin sakhaw kûtpui lawm hian a tibawlhhlawh lo thung.
Tun kara heti taka a bawlhhlawh thar chhan hi an thenawm state, Punjab-a lo neituten an thlai sengna ro an hal khuk nasat vang a ni ber.
Lo neitute tan hetianga an thlai ro an hal hi a tihralna rang leh man tlawm ber a ni a, thlasik thlai an chinna turin an hmun an thenna a ni.
“Lo hal hian boruak a tibawlhhlawh tih ka hria a, a tuar hmasa bertu chu keimah ka ni a, chutah kan khuain an tuar leh bawk,” tiin Bathinda district-a lo neitu, Surinder Singh chuan BBC Punjabi hnenah a sawi.
Sorkarin thlai ro tihralna kawnga a pui a nih si loh chuan hetianga hal mai loh chu an tan duhthlan tur dang a awm chuan loh thu a sawi bawk.
Indian Agricultural Research Institute (IARI)-in a chhinchhiah dan chuan Nilaini thleng khan lo neitu 3,600 chuang an awm a, kum dang aiin an tam zawk.
Sorkarin a chhinchhiahnaah chuan Delhi boruaka PM 2.5 awm zinga 32% zet chu meikhu vanga awm a ni.
Delhi boruak chhe lutuk hi politics-a inbeih nan hman mek a ni a. Union Environment Minister Bhupender Yadav chuan Punjab-ah pawh rorelna chang mektu, AAP chu demin lo neitute an thlai rote hal lova an senghawina tur khawl an neih theih nan sum an hmuh chu a nihna tur angin an hmang lo niin a puh.
“Phat rual lohvin anni hi gas chamber-a Delhi chantirtu an ni,” tiin Twitter-ah a tar lang.
Hetih laihian Delhi Chief Minister Arvind Kejriwal chuan sorkar laipui chuan lo hal a nih lohna tura thil tih dan tur ruahman (proposal) chu a hnawl niin a sawi thung.
Kejriwal-a chuan boruak a bawlhhlawh lutuk chu India hmar lam state zawng zawng tana buaipuiawm a nih thu a sawi bawk.
“Hemi chungchangah hian engvangin nge prime minister hian thutkhawm a koh loh?” tiin Nilaini khan thuthar lakhawmtute hnenah a sawi a. “He thil hi politics khelh nan chauh an hmang a, tumahin a chin felna tur an sawi lo,” a ti.