Supreme Court chuan Lakshar-e-Toiba firfiak pawla mi, Mohammed Arif chu kum 2000-a Red Fort beihnaah thiam loh a chantir hnuah thi turin a hrem chu a kaltlangpui.
Red Ford beihnaah hian army officer pahnih leh mi dang pakhat an thi a. Court dangin thi tura Arif-a a tihna ennawn tura petition lut chu Chief Justice U.U. Lalit leh Justice Bela M Trivedi thutna bench chuan ngaihtuahin a kaltlangpui ta tho a ni.
Bench chuan thil thleng zawng zawng thlirin Arif-a dan bawhchhiatna chu finfiah vek a ni a, hremna pek ennawn tura ngenna chu a hnawl tih a sawi.
December 22, 2000 khan mi sualin Red Ford hi luhchilhin silai an hmet puak a, mi pathum an thi.
Arif-a hi December 25, 2000-ah man niin Pakistani a ni tih a inpuang a, trial court chuan thi turin a hrem a. Delhi High Court pawhin hremna a tawrh tur chu a nemnghet nawn leh tawh a, court sang ber pawhin a kaltlangpui ta a ni.