Ningani khan Election Commission of India chuan Gujarat assembly inthlan hun a puang ta a. Inthlan hi kil thum atanga beihna a nih hmel a, Aam Aadmi Party (AAP) chuan Prime Minister Narendra Modi leh Union Home Minister Amit Shah-a te chawr chhuahna state-ah hian rorelna chan ngei an tum a. Hetih lai hian BJP chuan kum 30 vel ro lo rel tawhin Congress chu an elpui a ni leh dawn bawk.
ECI chuan 15th Gujarat assembly 15-na inthlan hun atan December 1 leh 5 ruat a nih thu puangin vote tlate chu December 8-ah chhiar turin a ruahman.
Gujarat inthlan puan hma hian bial 68 awmna, Himachal Pradesh assembly inthlan hun atan November 12 ruat a nih thu ECI hian a lo puang tawh a. October 15-a inthlan puan a niha Gujarat inthlan hun puan ve a nih loh khan eptute chuan state hnih a rual deuh zela inthlang leh inthlan hun puan rual thin a nih avangin ECI chu BJP-in inthlan hmaa duh tawka chet an lak theih nan hun peah an puh hial a ni.
Kum 2017 inthlanah khan BJP chuan Gujarat-a thuneihna an chan hnua an chet chhiat ber tawngin bial 182 awmah bioal 99 chauh an la a. Congress-in bial 77, Bharatiya Tribal Party-in pahnih leh Nationalist Congress Party-in pakhat an la a. Independent-a chuhten a dang zawng an la bawk.
BJP chet that ber tum chu kum 2002-a Modi-a chief minister a nih lai kha niin bial 127 an la a. Congress chet that ber tum chu kum 1985-a Madhavsinh Solanki-a kaihhruaina hnuaia bial 149 an lak kha a ni.
Kum 2017-a hnehna an chan leh khan BJP hian a zawnin term nga sorkar an siam ta a; Congress pawh term hmasa aiin an dinhmun a tha hret zawk a; mahse, a hnuah an MLA 14-in BJP an zawm leh thung.
Congress hian kum 2017 inthlan dawn khan hna nei lo tam, Patidar tana hmun hauhsak, lo neitute leh pawisa tlang lian tihthih kha an au hlaah an hmang a. Dalit hruaitu, Patidar hnam, Jignesh Mevani leh Hardik Patel bakah Other Backward Class (OBC) hruaitu, Alpesh Thakor te chuan nasa takin BJP an bei a; mahse, a hnuah Patel-a leh Thakor-a hian Congress an chhuahsan leh tho thung.
Kum 2022 inthlan turah hian AAP chuan ei rukna, zirna, healthcare leh hna nei lo tam chu an tlangaupui mek a. BJP lennaah hian thuneihna an chang a nih chuan electric leh zirna thlawn, thalai hna nei lo leh hmeichhia kum 18 chin tan thla tin stipend pek an tiam.
March thlaa Punjab inthlana hnehna an chan hnu lawkah khan Gujarat-a district 33-a 30 zetah AAP hian ni hnih chhung kawngzawhpui an huaihawt a. Kejriwal leh Punjab Chief Minister Bhagwant Mann chuan Gujarat hi tlawh sekin assembly bial 90 chuang awmna – Saurashtra, Surat leh Tribal region-ah vawi tam vantlang inkhawm an huaihawt tawh.
Kum 2017-a Hardik Patel-a nena Patidar hnam tana hna leh thil dang hauhsak an nih theih nana nawrtu, Patel Anamat Andolan Samiti convenor Alpesh Kathiriya chu Kejriwal-a hian AAP-ah a lawm lut tawh bawk.
AAP hian Isudan Gadhvi leh Gopal Italia chu an hmatheh langsarah an hmang mek a. Italia zawk hi tun hnaia video hlui pakhat, tawngkama Modi leh a nu a deusawhna lam thehdarh a ni bawk.
Kuminah hian BJP sorkar duh lohna thil lian a thleng zauh zauh va. Sorkar hnathawkte chuan hlawh tha zawk leh hnathawktu dinhmun tha zawk an phut a. Zirtirtu, forest department hotu lian, Bharatiya Kisan Sangh, mid-day meal worker leh mi dang dangin August leh October inkar khan sorkar laka thil ngiat leh phuta lungawi lohna lantir an ngah hle a. A tam zawk erawh hi chu sorkarin an phut tihhlawhtlin a tiam angin an lungawi loh lantir an titawp tawh.
Star campaigner Modi chuan March 11 khan Ahmedabad-ah roadshow huaihawtin BJP campaign a hawng a. A hma ni chiahah BJP hian Uttar Pradesh, Uttarakhand, Manipur leh Goa-ah sorkar an siam.
Modi-a hian an state hi thla khatah vawi hnih vel tlawh ziah ang a ni a. Tun hnaia a tlawhah hmasawnna ruhrel din tam tak hawngin vantlang inkhawm a huaihawt a. Shah pawhin hetiang bawk hian a ti a. Gujarat-a an party chief C R Patil chu BJP thluakbur tur zinga mi a ni bawk.
BJP hian an candidate tur an la puang lo va. Chief Minister Bhupendra Patel chu an chak leh a nih chuan a nihna ngai a chelh zui rin a ni.
“MLA ni lai 30% vel chu an ding tawh dawn lo va. Patil-a hian hruaitu hlun pali chu candidate ni tawh lo turte zir chiang turin a ti tawh,” tiin BJP hotu sang pakhat chuan a sawi.
Gujarat hian inthlan dawn hnaihah National Games leh Defence Expo 2022 a thleng a, chhiatna lian pahnih a tawk bawk a. Botad leh Ahmedabad district-ah zu chhe in vangin mi 42 vel an thi a, October 30-a Morbi-a lei chimah mi 135 vel an thi bawk.
Kejriwal-a chuan thawm la nei na lo Congress chu theihnghilh chi an ni lo tih a sawi tawh a. Modi-a pawhin BJP mite hnenah Congress-in an kal dan thlakin ngawi rengin hna an thawk tih a sawi bawk.
Gujarat leh Himachal Pradesh-a inthlan tur hi Mallikarjun Kharge-a’n Congress chief nihna a chelh hnua inthlan hmasak ber tur a ni a. Kum 20 chhunga Congress-in Gujarat-a an thluakbur thin, Ahmed Patel-a tel lova inthlan an hmachhawn hmasak ber tur a ni dawn a, ani hi nikum December khan a thi a ni.
Congress hruaitu, Rahul Gandhi-a chuan thlan tlin an nih chuan electric thlawh leh Rs. nuai 10 thleng lak theihna health insurance thlawn a tiam a. Rajasthan Chief Minister Ashok Gehlot chu Gujarat Congress incharge a ni bawk a. An party hi kumina Hardik Patel-a’n BJP a zawmsan hnuah an dinhmun a tha lo.
Congress MLA Anant Patel-a chu tun inthlana an hmatheh tur langsar a nih hmel a. Ani hi May thlaa sorkar laipuiin Par-Tapi-Narmada river-linking project a siam duh lohna lantira huaihawttu, tribal-te chenna tihchereuna tur tia dodalna lantira sorkar pawhin an thulh phah takna bul kha a ni.
OBC hruaitu, Thakor-a chu tunah Gujarat Congress president a ni mek a. Chief ministerial atan erawh an tih a rinawm loh.