Kumin chhungin Mizoramah thosi seh atanga kai theih natna, dengue kai hmuhchhuah mi 437 an awm tawh a, he natna avanga thi mi pahnih an awm tawh.
Directorate of Health Services hnuaia State Vector Borne Disease Control Programme (SVBDCP) thuchhuahin a tar lan danin, kumin January atanga October thleng khan Mizoramah dengue kai hmuhchhuah zat 437 a ni a, kumin chhunga hri kai hmuhchhuah tam ber thla chu September niin, mi 159 an awm a; thla liam ta, October khan mi 143 awmin an zinga mi pahnihin an thihpui.
Dengue natna thehdarhtu chu thosi tam tak zinga chi khat, Aedes an tih chu niin, he natna thlentu hi Mizoramah a tam hle niin SVBDCP thuchhuah chuan a tar lang a. Aedes-in mihring a seh atanga ni nga atang ni ruk chhungin natna a lang chhuak a, inenkawl ran chuan tihdam theih a ni a, enkawl thuai a nih loh erawh chuan thihpui theih hial khawpa hlauhawm, Dengue Haemorrhagic Fever thlen thei a nih thu a tar lang.
He natna kai lo tur hian in leh a vela tui tlin theihna reng reng tihfaia thosilen zar thata, thosi huat chi hrang hrang hmana, in chhunga thosi luh lohna tura inkhar phui a tul thu te SVBDCP thuchhuah chuan tar langin, dengue natna laka inveng tur hian mi tinin mawhphurhna leh tih tur an neih thu tar langin, tan la turin mipui an ngen bawk.