Aizawl: Mi cheng tam dana chhutin Mizoram chu HIV/AIDS tamna ber leh cancer hluarna ram a ni chu inenfiaha tan lak a tul thu Health Minister Dr R Lalthangliana’n a sawi.
Nilaini zana ‘MSACS- Rimawi Khawvel Music Award 2022’ semna, Vanapa Hall-a neihah khuallian niin Dr R Lalthangliana’n a hmanpui a. Thu sawiin, “India ramah hian Covid-19 do chungchangah leh thil tam takah kan hming that hle laiin mi cheng tam dana chhutin HIV/AIDS tamna ber leh cancer hluarna kan ni hi a pawi hle a, kan inenfiaha tan kan lak a ngai takzet a ni,” a ti.
Health minister hian ram changkang taka ngaihteah pawh AIDS a hluar tih sawiin, Mizoramah pawh he natna tihdam theih loh dona kawngah Central YMA nen hun liantham tak siam an tum thu a sawi.
Dr R Lalthangliana hian Nagaland-a 1st North East Geology & Mining Ministers Conference neih zawh taka khuallian nia a hman zawh hnuah Nilaini khan Mizoram haw kawngah Rangvamuala Gospel Camping neih mekna hmun a tlawh a. Camp neihna hmunhmate enpuia medical duty-te tlawhin tul leh mamawh an neihte a hnena thlen turin leh a theih anga tanpui a inhuam thu a sawi.