Aizawl: Deputy chief minister hlui, Lalhmingthanga chu Ningani zan zanlai dar 12:40 khan Khatla-a an chenna inah a thi a, nimin khan vui liam a ni.
Kum 82 mi, Lalhmingthanga hi Hrangbuana (L) leh Lalziki Sailo (L) te fapa neihchhun leh fa hmingkoh niin, June 9, 1940-ah Vanhne khuaah a piang a, pianpui farnu pali a nei.
October 24, 1968-ah Dawrpui, Aizawl nula, Rothuami nen Shillong-ah inneiin, fapa pahnih leh fanu pali, tu 21 leh tuchhuan 10 an nei.
Vanhne Primary School atanga zirna bul tanin, Lunglei High School-a a chhunzawm hnuah St Anthony College, Shillong atanga BA a zawh leh hnuah Guwahati University atanga MA (English) a zawh kum tur, 1966-ah Mizoram a buai tak avangin chhungkaw tan a inhlawh a tul a, MA chu zo ta lovin hna a thawk chhunzawm ta a, Assam Civil Secretariat-ah te, sikul zirtirtu hna te, PWD hnuaiah register contractor leh supplier hnate thawkin a inhlawh zui ta a ni.
Kum 1975-a PC party a din khan Sub-headquarters, Lunglei president hmasa ber a ni a, kum 1978-a MLA inthlanpuiah Lunglei bial atanga thlan tlin a ni a, MLA inthlanah hian vawi ruk thlan tlin a ni. PC sorkarah cabinet minister niin, finance, PWD, revenue leh department dangte a enkawl tawh a, kum 1988-a MNF leh PC party tangdunin sorkarna an siam khan deputy chief minister a ni.
Kum 1993-a PC party leh Congress party thawkdun sorkarah cabinet minister a ni bawk a. Politics-a a hun tawp lamah MNF party-ah lutin tunah hian adviser a ni mek.
Baptist Church of Mizoram, Central Church, Aizawl-ah lawiin, kohhran upa a ni a, kum 2021 khan active upa a nihna atangin a chawl a, Pathian rawngbawlna kawngah theihtawp chhuah thin a ni.
Thluaka thisen tling avanga Delhi-a zai a nih atangin depression leh anxiety a nei a. April, 2022 atang khan damdawi in a lut chhuak reng a, October 29 atanga khan khawsikin tlakbuakin ama duh dana in lama theihtawpa enkawl a nih laiin Thawhlehni atang khan a zual a, Nilaini zan zanlai pelh hnu, Ningani zing dar 12:45 khan a thi ta a, nimin chawhnu dar 1 khan Rev H Lengluta’n a vui a ni.