Lengteng bialtu MLA L Thangmawia’n MLA a nih kum li chhunga COVID19 leng avanga hnathawhna hun kum khat awrh chauh a awm avanga a bial mipuite beisei a phaklohnaah ngaihdam a dil.
YMA, Kawlkulh branch-in nimina Diamond Jubilee an law- mna a hmanpuinaah bialtu MLA L Thangmawia chuan a bial mipui beisei a phaklohnaah ngaihdam a dil a. YMA-in hun kal tawha tha taka an thawhpui anga hun lo kal leh turah pawh thawhpui chhunzawm zel turin a ngen bawk.
Kawlkulh mipuite chu Kawlkulh YMA Diamond Jubilee chibai bukin, L. Thangmawia chuan Kawlkulh khawtlang tana thahnemngai taka lo thawk tawh thintu zawng zawngte pawh Jubilee pualin zahna chibai a buk a. YMA chu pi leh pi hun atanga tlawmngai pawl, chhiat ni that ni ah khawtlang innghahna a nih thu sawiin, pawl thianghlim leh tun thlenga NGO lian ber, hnamdangte pawhin an hriat lar a nih thu a sawi.
Nimin vek khan L. Thangmawia chuan a biala hmasawnna hnathawh hrang hrangte pawh tlawhin, Kawlkulh by-pass road laih hna thawk mektute hnenah kawng zauh hna chu kumin December thla ral hmaa zo hman tur leh fur lo thlen leh hmaa blacktop zawh hman hram tum turin a chah a.
Puilo khuaa Health clinic centre sak mek pawh tlawhin, sak zawh a nih ve leh Health Worker leh Helper dah nghal a nih tur thu a sawi.
NHIDCL hnuaia Champhai kawng lai mektu DBL Company hotute pawh an camp-ah tlawhin, Kawlkulh Field No 2 laih hna tan leh thuai turte, Pu Aichhinga Road (Puilo – Tuichang)-in national highway a pawhna siamtha leh thuai tur leh CSR atanga Puilo Health clinic centre sakna tur Rs. nuai 6 an pek tur tifel thuai turte in a ngen a. DBL Project Manager Simanta Sharma’n an hnathawk Diwali chawlh hmang te an lo kir leh ve leh an lo bawhzui nghal tur thu leh CSR fund pawh ni 15 chhunga an pek fel tur thuin bialtu MLA chu a lo chhang a ni.