Congress thupuangtu, Dr Lallianchhunga chuan mipuite beisei pha lo MNF sorkar lakah hian mipuiten thutlukna an siam fel tawh niin a sawi.
MPCC Campaign Committee ruahmannain October 29, 2022 atanga Aizawl local council huam chhunga Congress unit tlawhchhuah hun hman chu November 3, 2022 khan neih zawh a ni a. He hunah hian Congress atanga MLA, MPCC Gen.Secy, Secretary leh Executive member te, MPCC Frontal leh Dept/Cell president/chairman leh an thawhpuite bakah ADCC gen. secy leh secretary rualten hun an hmangin, team leader an inruat nghal zel a ni.
Laipuitlang leh Bungkawn Unit an tlawh tum a team leader, Dr Lallianchhunga, MPCC Spokesperson chuan thu sawiin Congress party chu pawl zahpuiawm lo tak mai niin, sakhaw zalenna chawisangtu pawk a nih avangin kohhran rawngbawltu tam takte awm mekna a nih thu a sawi a. “Mizoram tan thil tha tam tak Pathian zarah a lo thawk hlawhtling tawh a, hengte hi thangtharte hian an la chhawr dawn chauh a ni. Kan tih tura kan hmachhawpte pawh thang leh tharte tana rotling tur a ni zel,” a ti.
MNF chungchang sawiin Dr Lallianchhunga hian, “MNF sorkar hi Lal Saula hun hnuhnung ang mai kha a ni a; Pathian hriak thih Davida tan Lal Saula beih nan hun a uihawm lutuk. MNF sorkar hi eptu party-ten an beih ngai miah loin an thiltih that lohin a rawn vaw let zel. CM fanuin doctor kut a thlak pawh eptu party-te hmalak vang a ni lo. Kamrula Chhangte bakah, Assam sorkar wanted Abu Majumdar te nena sam an inphiar zawm dante hi Mizo mipuiten kan hria, MNF lakah hian mipuiten thutlukna kan siam fel tawh,” a ti.
ZPM chungchang pawh sawiin Dr Lallianchhunga hian, “Congress party chuan enchhin pawh ngai lo, sum leh paia mi rinawm, Mizoram sorkar sum dinhmun siam tha theitu tur hruaitu kan nei a. Khawi ramah mah ‘min enchhin ve rawh u’ tiin party an inzuar ngai lo. Eng ram mahin ‘Enchhin sorkar’ (experimental government) an duh lo. Mi tha nia an hriat, an hriat chian sa an thlang thin zawk a ni,” a ti bawk.
MPCC thupuangtu chuan Congress manifesto pakhatna, ‘|ang Puihna’ hi rilru siam thatna (moral reformation) nena inkawp tlat nia sawiin, “Bible zirtirna nena inmil manifesto a ni,” a ti a. Dinchhuah tuma theihtawp chhuahtute an kalsan loh tur thu leh an mamawh dan a zirin cheng nuai bi atangin mamawh intawm a nih phei chuan cheng vaibelchhe tel thlengin an pui dawn niin a sawi.