Lok Sabha MP C Lalrosanga’n hmarchhak bialah ruihhlo vanga rilru lama harsatna nei tam tak an awm thu sawiin, heng mite hian mithiamte leh enkawlna ṭha an mamawh thu New Delhi-a Parliamentary standing committee on health and family welfare ṭhutkhawm, tunkar Ningania neihah a sawi.
Rilru lama natna leh harsatna hrang hrang neite chungchang sawihonaah hian Lok Sabha member C Lalrosanga chuan heti lama harsatna tawkte hian mahni inchhung leh anmahni enkawlna hmun bika mithiam leh inpete enkawlna ṭha an mamawh hle tih a sawi.
Parliamentary committee ṭhutkhawmah hian Tezpur, Assam-a Lokpriya Gopinath Bordoloi Institute of Mental Health, Central Institute of Psychiatry, Ranchi leh National Institute of Mental Health and Neurosciences, Bangalore-a mithiam ten rampuma rilru lama harsatna chi hrang hrang neite enkawlna kawnga harsatna leh mamawh an neih te an sawi bawk.
Lok Sabha MP C. Lalrosanga chuan tunkar Ningani vek khan Consortium for Global Education, United States hotute chu Union Minister of State for Education and External Affairs Rajkumar Ranjan Singh hmuhpuiin, zirna lama India leh United States thawhhona zau zawk a awm theih dan tur kawngte an sawiho a. Consortium for Global Education hi an President Dr Carolyn Bishop chuan hovin, America-a University hrang hrang hotute an tel.
Hemi hma hian Lok Sabha MP C Lalrosanga chuan Rajkumar Union Minister of State for Education and External Affairs chu kawmin, Mizoram leh Manipur-a Myanmar atanga bungraw tawlhluh mek a nih dan te a hranin a sawipui hmasa tawh a. Dan kalha Kuhva leh bungraw thenkhat tawlhruk thin chu sorkarin a ngaimawh thu leh hemi chungchang hi a hrana ngaihtuah zui ni se a duh thu a hrilh.
Lok Sabha MP C Lalrosanga chuan Myanmar atanga raltlan lo lutte chhawmdawl chungchang leh KMMTTP kawng chungchangte pawh Union MoS chu a sawipui bakah Mizoram district hrang hranga Kendriya Vidyalaya leh Jawahar Navodaya Vidyalaya din tul a tih thu te a hrilh bawk.