India-a voter ni hmasa ber’ tia an sawi thin chu kum 105 mi niin a thi.
Shyam Saran Negi-a hi Britain rorelna hnuaia an awm atanga an zalen hnua India-in inthlanpui a huaihawt hmasak berah vote thlak hmasa ber nia sawi a ni.
Hemi hnuah hian Negi-a hian inthlan apiangin vote a thlak ta ziah a ni.
Negi-a hi Inrinni khan a thi a, a thih hma ni thum lekah khan an state, Himachal Pradesh-a assembly inthlanah vote a la thlak nghe nghe.
A vanglaia zirtirtu ni thin hi India a zalen hnua vote thlak hmasa ber anga chhiar a nih chhan hi an state-ah hian kum 1952 inthlan turah a hma thla ruk la awm, kum 1951 khan an awmna polling booth chu vur tlak hlauhna avangin an hawng hma bik a ni.
British-ten kum 100 dawn, kum 1848 leh 1947 inkar an awp hnua India-a inthlan hmasak berah hian Indian National Congress chuan chiang taka hnehna changin Jawaharlal Nehru chu prime minister hmasa ber a ni.
Kar hmasa tir lamah khan Electoral Commission of India chuan November 12-a an state inthlan tura Negi-a tan hian red carpet an phah dawn tih a lo puang tawh.
Indian chanchinbute chuan tun tum inthlan tur hi Negi-a’n polling booth a thlen loh hmasak ber a nih dawn thu leh a hriselna hniam tawh avangin ballot hmangin a thlak dawn tih an lo tar lang hman tawh.
Kum 2014 khan Negi-a hi ECI chuan brand ambassador atan a lo ruat tawh a, hei hi miin vote an thlak duh nana an tih a ni a. Hemi kuma India inthlanpuia miin vote an thlak duh theih nana Google-in zirtirna video a siamah a lang.
Nilainia vote a thlak hnuhnung berah pawh khan ballot paper nen thla a lak chu The Tribute chanchinbuah langin thalaite chu vote thlak turin a sawm.
“Thalaite hi mipui rorelna kalphungah hian an tel tur a ni a, chu chu an chanvo a ni mai lo va, an tih tur a ni,” a ti.
Inrinnia a campaign-naah pawh Prime Minister Narendra Modi chuan Negi-a chu a fak a. Sorkarin an khua, Kalpa-ah ram chawimawina famkim nen a vui dawn thu a sawi.