Aizawl: Chief Minister Zoramthanga hovin nimin khan a kaihhnawih mipawimawh ten Mizorama National highway-a hnathawh mek dinhmun leh harsatna awmte an sawiho a. NHIDCL hnathawh dinhmun leh harsatnate an thlirho.
Vairengte Sairang kawng (NH-306 & 6), Lunglei – Tlabung (NH-302), Selina Dulte (NH-6), Chhatlang leh Serchhip by-pass (NH-53); Keifang- Tuivai (NH-102B) leh Tuipang (NH-54) a forest clearance chungchang te, utility shifting chungchanga P&E department nena indawr mekna te Chief Minister hova thukhawm hian an sawiho a. Working season laia a tam thei ang ber thawh a nih theihna tura a tul anga sorkar laipui hotute hnena thlen ngaite thlen ni se, an ti.
Chief Minister hova kawng dinhmun sawihonaah hian Land Revenue & Settlement Minister Lalruatkima bakah EF&CC Principal Secretary Navin Kumar Choudhary, PWD Secretary K. Lalthawmmawia te leh Revenue leh P&ED hotute pawh an tel a ni.