November 6-a Karnataka Teachers’ Eligibility Test (TET-2022) neihah exam beitu zinga pakhat exam hall ticket (admit card)-ah Bollywood lemchang thiam, Sunny Leone-i thlalak dukdak lo tak chuang nawlh chu chhui zui mek a ni.
Admit card thlalak hi an screenshot a darh nual hnuah education department chuan chhui turin thu chhuah a siam a ni.
Exam beitu hi Rudrappa College-a exam tur a ni a, a ticket-ah lemchang thiam, tun hma lamah phei chuan puitling film lama chang thin thlalak a chuang hmuh a nih chuan principal-in Cyber Crime police hnenah complaint a thehlut nghal bawk.
Police chuan hetiang thil hi online-a application thehluhnaa thlalak dah luh telnaah tihpalh thila tel a ni thei tih an sawi.
Exam beitu erawh chuan online-a application a tih loh thu leh ama thu anga mi dang erawh a tihtir thu a sawi thung.
Education department chuan thuchhuah siamin exam beituin online-a application a ti a nih chuan user ID leh password hrang an pe zel a, tute mah inhmantawm emaw, inpawlhsawp palh thei a nih loh thu an tar lang.
Department chuan examination hall ticket-a thlalak inbel chungchangah hian anni chuan inrawlhna an neih theih loh thu leh candidate-ten anmahnia an thehluh ngei a nih thu an tar lang bawk.
“Chanchinbua department tihdik loh anga tar lan awm hi a ni lo va. Police hnenah chhui chiang turin kan thlen tawh a, a tisual leh pawikhawihtu chu hrem ngei a ni ang,” tiin Public Instruction Department chuan an thuchhuahah an tar lang.