Aizawl: YMA rorelna sang ber dawttu, Central Co-Ordination Commitee (CCC) thutkhawm vawi 95-na chu nimin khan Central YMA Hall, Tuikhuahtlang, Aizawl-ah neih niin, YMA Rorel inkhawm neih zawh taka thurel hrang hrang bawhzui dan tur an rel.
Central YMA President R Lalngheta kaihhruai thutkhawmah hian October 27, 2022-a YMA Rorel Inkhawm vawi 3-na, Thingsulthliah-a neih zawh taka thurel hrang hrang bawhzui dan tur an rel a. YMA khawihah hma lakna tur 10 leh sorkar khawihah hmalakna tur pali an ngaihtuah a ni.
An hmalakna tur an ngaihtuah zingah eirukna leh hlemhletna a reh theihna atana hma lakna kalpui dan tur chungchang te, hnam dangte hnena in hmun/huan/lo ram lei leh hralh/hlan chhawn anih zel lohna tura hmalak chungchang te, YMA chet velnaa hliam tuar/ nunna chânte tanpuina/ralna pek chungchang te, land reform kalpui chungchang te, Mizoram hmun hrang hranga asorkar damdawi inte hi hmanraw tha zawk leh thawktu tam zawk daha sorkarin a thuam that te, Market Regulaion Act, 2022 a taka hman te, vocational course zirna uar zawka kalpui a nih theihna tura hma lak dan tur te rel a ni.
Heng thurelte hi Central Executive Committee bawhzui atan an dah a ni.
YMA Central Co-Ordination Committee (CCC) thutkhawm hi kum khatah vawi thum koh a ni a. Nimina CCC thutkhawm hi kumin atana a hnuhnung ber a ni.
CCC member-te chu – Central YMA office bearer; Central Executive Committee Member; Sub-Headquarters YMA aiawh mi paruk; Group YMA aiawh mi pahnih; Aizawl khawpui Branch YMA aiawh mi pakhat theuh te an ni.