Congress party chuan MNF sorkar chu deputy chief minister-in a sawi ang ngeiin kumin chhung ngeia Lunglei Municipal Council (LMC) inthlan buatsaih turin an ngen.
Nimina an thuchhuahah MPCC chuan Deputy Chief Minister Tawnluia hmalaknaa LMC inthlan atana inbuatsaihna thui tak a kal tawh lai leh LMC sorkar siam ngei tuma political party-te pawhin theihtawp an chhuah mek laia, ruling party atanga inthlan tikhawtlai zawnga hmalakna chak tak a awm chu pawi an tih thu sawiin, “MNF sorkar chu kumin chhung ngeia inthlan buatsaih tur a ngen,” an ti.
MPCC hian May 12, 2022 khan Deputy CM chuan kumin (2022) chhung ngeia LMC inthlan hi buatsaih a nih tur thu a lo sawi tawh a. LMC inthlanna tur final electoral roll pawh October 14, 2022 khan tlangzarh tawh niin, he inthlan inbuatsaihna atan pawh Mizoram sorkarin State Election Commission (SEC) leh Secretary tur pawh August 2, 2022 khan ruat an ni tawh thu an sawi.
Sorkarin inthlan a buatsaih lohna chhan nia a sawi LMC office peih fel la ni lo anga sawite pawh peih fel vek tawh a nih thu sawiin Congress party hian, “MNF party chhunga hruaitute inmil lohna avang te, Lunglei, Siaha leh Lawngtlai panna kawngpui chhe lutuk te hi LMC inthlan an buatsaih ngam loh chhan a ni zawk em tih MNF sorkar hi kan zawt a. Hengte hi an chhuanlam a nih loh chuan LMC hi a nih dan tur dik tak a din a nih theih nana inthlan hi buatsaih thuai turin MNF sorkar a ngen a ni,” an ti bawk.