Aizawl: Larsap Hari Babu Kambhampati-a’n nimin khan Raj Bhavan-ah Sri Ramachandra Medical College (SRMC), Chennai-a thawk lung lam doctor thiam rual, Mizorama cham mekte a kawm.
SRMC-a thawk lung lam doctor mi pariatte hian November 10 atanga 12 thleng khian Lunglei Civil Hospital-ah a thlawnna inentirna hun, lung lama harsatna neite tan an buatsaih dawn.
Nimina an inkawmnaah hian larsap chuan a mikhualte chu Mizorama an thil tih tur chu mipui rawngbawlna ropui tak a nih thu a hrilh a, Mizoramah inenkawlna damdawi in changkang zawkte a la neih loh avangin hetiang natna khirh deuh inentirna hun hi ni dangah pawh buatsaih thin turin a sawm.
Larsap chuan Lunglei DC hmalakna zarah damloten anmahni kawtkaiah doctor thiam an rawn thei tur chu lawmawm a tih thu a sawi a; district dangte pawh hetiang lamah hian an bengvar tha a tih thu a sawi bawk a ni.
SRMC doctor-te hi cardiologist leh cardiac surgeon te an ni a. Dr. JS Satya Narayana Murthy, Head of Cardiology Department chuan SRMC team hi a ho a, member-te chu Dr. Vanaja, Dr. T. Periyasamy, Dr. R. Jebaraj, Dr. Nithesh Kumar A, Dr. Lakshmi Durga Kumaraguruparan, MS B. Malathy leh MS L. Gokulalakshmi an ni.
Lung lam inentirna hun an buatsaih rual hian cancer natna veite pualin Cachar Cancer Hospital & Research Centre atanga doctor thiam rualten free clinic an buatsaih dawn bawk a ni.