Thenzawl Dragon Fruit Grower’s & Marketing Society-in nimin khan General Assembly hmasaber an hmang a, Horticulture Development Board Vice Chairman, MLA Prof. F Lalnunmawia’n hmanpuiin, SEDP pilot project zinga Dragon Fruit hlawhtlinnain sorkar a chawimawi nia sawiin, sorkarin a market a ngaihtuahpui zel dawn niin a sawi.
Prof. F Lalnunmawia chuan SEDP bulṭanna atan Mizoram hmun hrang hrangah, thlai chi hrang hrang hmangin kum 2019 aṭang khan pilot project kalpui ṭan a nih thu sawiin, chung zingah chuan Thenzawl ram Pukpui Zâu, Tui- ripup Zâu, Kawipui Zâu leh Mualvum Zâu-ah te Dragon Fruit chinna tur ruahman a nih thu leh heng zâu-a hmalaknate hi a tirtê aṭanga sorkarin a hriatpui bakah a theih ang anga bul a tanpui thu a sawi.
SEDP pilot project kum 2 lekah a rah seng tur a awm ṭan nghal chu lawmawm a tih thu F Lalnunmawia chuan a sawi a. “Kan sorkarin kuthnathawktute dawmkanna tura flagship programme a ruahman SEDP hlawhtlinna kan hmu chho zel” a ti.
F Lalnunmawia chuan SEDP leh MIDH sum hmangin district dangah pawh Dragonfruit chin belh mek zel a nih thu sawi in, tharchhuah pawh a pung zel a, a hralhna pawh sorkarin a ngaihtuah zel dawn tih a sawi a. Kuthnathawktu ten a huhova hmalaa society-te dina awmze nei zawka thei leh thlai chin an uar chhoh mek thu sawiin, Tomato, Lakhuihthei bakah thlai chi hrang hrang an thar tam tial tial a, society hma la ṭhate chu sorkar tan pawh puih an phurawm thu a sawi bawk.
Sorkar thuchhuahin a tarlan danin Thenzawl rama Dragon Fruit chinna atan hian sorkar scheme hrang hrang FOCUS, MIDH leh SEDP aṭanga tanpuina pek a ni a. A panna kawng pawh SEDP sum Rs nuai 80 senga laih a ni.
Thenzawl Dragonfruit grower & marketing society hian kum 2020 June aṭanga hma la ṭanin, chh- ungkaw 54-in hma an la mek a, kumthar lamah chhungkaw engemawzat luh belh tir turin Horticulture department-in ruahman- na a siam mek.
Zau pali Pukpui, Mualvum, Tuiripup leh Kawipui zauah unit 118-ah Dragon Fruit ban 23600 chuang awmin, Unit tinah Ban (post) 200 zel a awm a. Collapsible water tank lian 13 siam niin, drip hmanga tuipekna tur kalpui ṭan mek a ni.
Kumthar aṭang chuan ban tinah Kg 10 tharchhuak thei tura an beisei thu leh chumi aṭang chuan wholesale rate, a chhe berah Kg khat Rs 130 anga chhut pawhin, Rs 35,00,000 chuang man hralhchhuah tur an neih ngei an inrin thu, TDGMS Chairman C Lalrinthanga chuan a sawi.